മനം നിറക്കാൻ മധുമന്ത്രങ്ങൾ:mantras to fill the mind-173

നഷ്ടങ്ങൾ നമ്മുടെയൊക്കെ ജീവിതത്തിൽ ചെറുതും വലുതുമായി ഒത്തിരിയേറെ ഉണ്ടായിട്ടുണ്ടാവും. നഷ്ടങ്ങൾ നമ്മളെ ഒരുപക്ഷെ മാനസികമായും, ശാരീരികമായും വളരെയേറെ തളർത്തിയേക്കാം.

നമ്മൾ തളർന്നാൽ നമ്മൾക്ക് തന്നെയാണ് നഷ്ടം സംഭവിക്കുക.

ചില നഷ്ടങ്ങൾ നമ്മൾ നേരിട്ടാൽ മാത്രമാണ് നമ്മൾക്ക് മറ്റു നേട്ടങ്ങൾ സ്വന്തമാക്കാൻ കഴിയുകയുള്ളു.

നമ്മൾക്ക് ഈ ലോകത്തു സ്വന്തം ആയിട്ടു കരുതുന്നതെല്ലാം ഒരുനാൾ നമ്മൾക്ക് മരണമെന്ന യാഥാർഥ്യത്തിലൂടെ നഷ്ടപ്പെടുമെന്നത് ഉറപ്പുള്ള കാര്യമാണ്. ഇന്നലെകളിൽ പലർക്കും സ്വന്തമെന്നുകരുതിയവയാണ് ഇന്ന് നമ്മളിൽ പലരും ഒരുപക്ഷെ അവകാശപ്പെടുത്തിയിട്ടുള്ള പലതും.

കാലത്തിന്റെ സഞ്ചാരത്തിൽ ഓരോ സമയവും ഓരോരുത്തരിലും നഷ്ടങ്ങളും നേട്ടങ്ങളും മാറി മാറി വന്നുകൊണ്ടിരിക്കും.

നമ്മൾ എപ്പോഴും നമ്മുടെയും മറ്റുള്ളവരുടെയും ഉയർച്ചക്കുവേണ്ടി ശ്രമിച്ചുകൊണ്ടിരിക്കുക. നാളെകളിൽ ഉയർച്ചകൾ നേടണമെങ്കിൽ ഇന്ന് നമ്മൾക്ക് നഷ്ടപ്പെട്ട കാര്യങ്ങളെപ്പറ്റി വ്യക്തമായ ധാരണയുണ്ടാകുകയും അതു വേണ്ട രീതിയിൽ തിരുത്താനും കഴിയേണ്ടതുണ്ട്.

നഷ്ടങ്ങളെ അതിജീവിച്ചാൽ മാത്രമാണ് മുന്നോട്ടു പരിശ്രമിക്കാൻ കഴിയുകയുള്ളു.

നഷ്ടങ്ങളിൽ തളർന്നിരുന്നാൽ നമ്മുടെ വിലപ്പെട്ട സമയങ്ങളാണ് നഷ്ടപ്പെടുകയെന്നത് തിരിച്ചറിയാൻ ഇനിയും വൈകികൂടാ.

നഷ്ടങ്ങളുടെ വില ഒരുപക്ഷെ നാളുകൾ കഴിഞ്ഞായിരിക്കും നമ്മളിൽ പലരും തിരിച്ചറിയുക, അന്ന് നഷ്ടങ്ങൾ തിരിച്ചറിഞ്ഞു വിഷമിക്കുന്നതിനേക്കാൾ നല്ലത് ഈ നിമിഷം മുതലെങ്കിലും സമയത്തെ വേണ്ടതുപോലെ ഉപയോഗപ്പെടുത്തുക എന്നതാണ്.

നമ്മൾ ഓരോരുത്തർക്കും എപ്പോൾ വേണമെങ്കിലും നഷ്ടങ്ങൾ സംഭവിക്കാം. നമ്മൾക്ക് എപ്പോഴാണ് നഷ്ടം ഉണ്ടാവുകയെന്ന് കൃത്യമായി ആർക്കും മുൻകുട്ടി പറഞ്ഞു തരാൻ സാധിച്ചെന്നു വരില്ല.

ഓരോ നഷ്ടവും അതിജീവിക്കാൻ അതിന്റെതായ സമയം ഓരോരുത്തർക്കും ആവശ്യമായി വന്നേക്കാം.

പരാജയങ്ങളിൽ, തടസ്സങ്ങളിൽ, നഷ്ടങ്ങളിൽ മനസ്സ് തളരാതെ മുന്നേറാൻ നമ്മൾ ഓരോരുത്തർക്കും കഴിയണം.

മാനസികമായും ശാരീരികമായും കരുത്തുനേടികൊണ്ട് നഷ്ടങ്ങളെ അതിജീവിക്കാനും നേട്ടങ്ങൾക്കായി ഊർജസ്വലതയോടെ പ്രവർത്തിക്കാനും ഇനിയുള്ള കാലം നമ്മൾ ഓരോരുത്തർക്കും സാധിക്കട്ടെ.