സ്നേഹസ്പർശനമായി കൺമുൻപിൽ:A spark of love to open your eyes-312

312.വിഷമമായി.

എന്തെല്ലാം വിഷമങ്ങളെയാണ് ഒരു മനുഷ്യൻ അവന്റെ ജീവിതത്തിൽ തരണം ചെയ്യേണ്ടി വരുന്നത്.പലർക്കും പലതരത്തിലുള്ള വിഷമങ്ങളാണ് ഉള്ളത്.ചിലരുടെ വിഷമങ്ങൾ പെട്ടെന്ന് തന്നെ മാറും, മറ്റു ചിലരുടെ വിഷമങ്ങൾ കാലങ്ങളോളം മനസ്സിൽ തങ്ങി നിൽക്കും.പലരും അവരുടെ ഉള്ളിലുള്ള വിഷമങ്ങൾ ആരോടും പങ്കുവെക്കാറില്ല, ആരുടെയും മുൻപിൽ വിഷമിച്ചു നിൽക്കാറുമില്ല.

നമ്മൾക്ക് ഒരു പക്ഷെ ഇപ്പോൾ സന്തോഷിക്കാൻ തക്കതായ കാരണം ഒന്നും ഉണ്ടാവില്ല, എങ്കിലും വിഷമിക്കാൻ ആണെങ്കിൽ നുറായിരം കാരണങ്ങൾ ഉണ്ടാവും.വിഷമിച്ചിരിക്കുമ്പോൾ നമ്മളോട് പലരും പറയാറില്ലേ ഇനി ഇപ്പോൾ വെറുതെ വിഷമിച്ചിരുന്നിട്ടു ഒരു കാര്യവും ഇല്ലായെന്ന്,ചെയ്യേണ്ടത് ചെയ്യേണ്ട സമയത്തു ചെയ്യണം ആയിരുന്നു, പറയേണ്ടത് പറയേണ്ട സമയത്ത് പറയണമായിരുന്നു, ശ്രദ്ധിക്കേണ്ടത് ശ്രദ്ധിക്കേണ്ട സമയത്ത് ശ്രദ്ധിക്കണമായിരുന്നു എന്നൊക്കെ.

വിഷമങ്ങൾ മൂലം നമ്മൾക്ക് ഒരുപാട് സമയം നഷ്ടപ്പെട്ടേക്കാം, പക്ഷെ എങ്കിൽ കഴിഞ്ഞ കാലങ്ങളിൽ നിന്നും ഒരുപാട് തിരിച്ചറിവുകൾ നേടിയെടുക്കാൻ നമ്മൾ അനുഭവിച്ച ഓരോ വിഷമങ്ങളും നമ്മളെ വളരെ അധികം സഹായിക്കുന്നുണ്ട്.

പലരുടെയും ഇന്നത്തെ വിജയത്തിന് കാരണം ആയത് അവരുടെ ജീവിതത്തിലെ ഇന്നലെകളിലെ വിഷമങ്ങൾ നൽകിയ തിരിച്ചറിവുകളാണ്.

വിഷമങ്ങളെ അതിജീവിച്ചുകൊണ്ടേ നേട്ടങ്ങൾ സ്വന്തമാക്കാൻ സാധിക്കുകയുള്ളുവെന്ന് ഈ പ്രകൃതി നമ്മളെ പഠിപ്പിക്കുന്നു.ഒരു കുഞ്ഞു ഈ ഭൂമിയിൽ പിറന്നു വീഴണം എങ്കിൽ കുഞ്ഞിന്റെ അമ്മ എന്തെല്ലാം വിഷമങ്ങൾ തരണം ചെയ്താലാണ് സാധിക്കുന്നത്.വിഷമങ്ങൾ വരും, പോകും നാളുകൾ കഴിയുമ്പോൾ വേദനകൾ പതിയെ കുറഞ്ഞോളും, ഇപ്പോഴത്തെ വിഷമം ഒന്നും സാരമാക്കേണ്ടതില്ല.വിഷമിക്കുന്ന സമയത്തു നമ്മൾ കൂടുതലായി അന്വേഷിക്കുന്നത് ആശ്വാസവാക്കുകളാണ്.എല്ലാവർക്കും വിഷമങ്ങൾ ഉണ്ടാകുമ്പോൾ അവയെ തരണം ചെയ്യാൻ ആശ്വാസവാക്കുകൾ കണ്ടെത്താൻ സാധിക്കട്ടെ.