ഉണർവിൻ പൊൻകിരണങ്ങൾ:The awakening golden rays-365

നമ്മൾ മനുഷ്യർ പല കാര്യത്തിലും സ്വാർത്ഥത(സ്വന്തം കാര്യത്തിൽ മാത്രം താല്പര്യമുള്ള ) പ്രകടിപ്പിക്കാറുണ്ട്.

ഒരാൾക്ക് ആവശ്യത്തിലധികം വസ്തുവകകൾ ഉണ്ടായിട്ടും മറ്റുള്ളവർക്ക്(സ്വന്തപ്പെട്ടവർക്ക് പോലും) നൽകാതെ പിടിച്ചുവെക്കുമ്പോൾ നമ്മൾ പൊതുവെ അവരെ സ്വാർത്ഥരാണ് എന്നൊക്കെ വിളിക്കാറുണ്ട്.

സ്വന്തം കാര്യത്തിൽ മാത്രം ശ്രദ്ധകൊടുത്ത് മറ്റുള്ളവരെ യാതൊരു വിധത്തിലും പരിഗണിക്കാതെ സ്വാർത്ഥരായാൽ ജീവിതത്തിൽ സന്തോഷവും സംതൃപ്തിയും സമാധാനവും ഒരുപക്ഷെ മുന്നോട്ടു ലഭിക്കണം എന്നില്ല.

എല്ലാവരും സ്വന്തം കാര്യത്തിൽ സ്വാർത്ഥർ ആയിരുന്നെങ്കിൽ ഇന്നിപ്പോൾ പലരുടെയും ജീവിതങ്ങൾ ദുരിതത്തിൽ ആയേനെ.

എത്രയോ മനുഷ്യരാണ് സ്വാർത്ഥത കൈവെടിഞ്ഞുകൊണ്ടു ചുറ്റിലുമുള്ള മനുഷ്യരെ സേവിക്കാനായി ഇറങ്ങിതിരിച്ചിട്ടുള്ളത്, അവരുടെ നല്ല മനസ്സാണ് ഇന്ന് ഒത്തിരി അധികം ആളുകൾ സന്തോഷകരമായി ജീവിതം മുന്നോട്ടു കൊണ്ടുപോകുന്നതിനുള്ള പ്രധാന കാരണം.

പണവും കഴിവും കരുത്തും സ്വാധിനവും ആയിരിക്കാം ഒരുപക്ഷെ നമ്മളെ സ്വാർത്ഥർ ആക്കുന്നത്.

നമ്മൾക്ക് ഇന്നുണ്ടെന്ന് അഹങ്കരിക്കുന്നതെല്ലാം നാളെകളിൽ ഒരുപക്ഷെ ഇല്ലാതെ ആയേക്കാം.

പണം ഏതുവിധേനയും സ്വന്തമാക്കണം എന്ന് സ്വാർത്ഥമായ ചിന്താഗതിയോടെ മറ്റുള്ളവർക്ക് ദോഷകരമാകുന്ന രീതിയിൽ പ്രവർത്തിച്ചാൽ ഇന്നുണ്ടാകുന്ന സന്തോഷം ഒന്നും നാളെകളിൽ ഉണ്ടാവുകയില്ല എന്ന് നമ്മുടെ ചുറ്റുപാടും ഉള്ള ഒത്തിരി മനുഷ്യരുടെ ജീവിതാനുഭവം നോക്കിയാൽ മനസ്സിലാവും.

ലോകം എത്ര സ്വാർത്ഥമായ ചിന്താഗതിയോടെ കിഴടക്കിയാലും അവസാനം മണ്ണോടു മണ്ണായി ചേരേണ്ടവരാണ് നമ്മൾ ഓരോരുത്തരും എന്നുള്ള തിരിച്ചറിവ് നമ്മൾ ഓരോരുത്തർക്കും ഉണ്ടാകട്ടെ.

ചില മനുഷ്യരുടെ സ്വാർത്ഥ താല്പര്യംമൂലം ദുരിതം അനുഭവിക്കുന്ന ഒത്തിരി മനുഷ്യരുണ്ട്.

നമ്മുടെ സ്വാർത്ഥതാല്പര്യം കാരണം ആർക്കെങ്കിലും വിഷമം അനുഭവിക്കാൻ ഇടവന്നിട്ടുണ്ടെങ്കിൽ, അതെപോലെയുള്ള സാഹചര്യം നാളെകളിൽ നമ്മളുടെ ജീവിതത്തിൽ വന്നുചേരില്ല എന്ന് ആർക്കും ഉറപ്പ് പറയാൻ കഴിയില്ലല്ലോ.

ഈ നിമിഷം നമ്മൾ ഭൂമിയിൽ ആയിരിക്കുക നമ്മളുടെ മാത്രം കഴിവ് കൊണ്ടല്ലല്ലോ, ഒത്തിരി മനുഷ്യർ നമ്മൾക്ക് വേണ്ടി അഹോരാത്രം കഷ്ടപ്പെടുന്നത് കൊണ്ടു കൂടിയാണ്.

മറ്റുള്ളവരുടെ ഭാഗത്തുനിന്ന് എന്ന് ചിന്തിക്കാൻ ആരംഭിക്കുന്നുവോ അന്ന് ഒരുപക്ഷെ സ്വാർത്ഥതക്ക് വിരാമം ഉണ്ടാകുമായിരിക്കും.

ഒരിക്കലും നമ്മളുടെ നല്ല കഴിവുകളും കിട്ടിയ സൗഭാഗ്യങ്ങളും മറ്റുള്ളവരുമായി ആവശ്യമായ സാഹചര്യത്തിൽ പങ്കുവെക്കുന്നതിൽ സ്വാർത്ഥരാകാതിരിക്കുക.

നമ്മളുടെ കഴിവും സമയവും സ്വാർത്ഥപരമായ കാര്യങ്ങൾക്കായ് ചിലവഴിക്കാതെ സമൂഹത്തിന് നന്മകൾ ആയിട്ടുള്ളതിന് കൂടി വേണ്ടിയാകട്ടെ.

നമ്മളിലെ സ്വാർത്ഥത കൈവെടിഞ്ഞു അർഹതപ്പെട്ടവർക്ക് അർഹതക്കുള്ളത് നൽകുക. നാളെകൾ നമ്മളുടെ നല്ല പ്രവർത്തികൾ മറ്റുള്ളവർക്ക് മാതൃകയാക്കാൻ കഴിയട്ടെ.