ഉണർവിൻ പൊൻകിരണങ്ങൾ:The awakening golden rays-362

പല സാഹചര്യത്തിലും സ്വയം വില നഷ്ടപ്പെടുത്താറുണ്ട് നമ്മളിൽ പലരും.

മറ്റുള്ളവർ നമ്മളെ ഒരുപക്ഷെ ഉപദേശിച്ചേക്കാം സ്വയം വില കളയരുതെന്ന്.

പല സാഹചര്യത്തിലും പലരും നമ്മളെ കളിയാക്കിയേക്കാം, വിമർശിച്ചേക്കാം തരം താഴ്ത്തി സംസാരിച്ചെന്നും വരാം അന്നേരം നമ്മൾക്ക് തന്നെ സ്വയം വില ഇല്ലായെന്ന അവസ്ഥ ഒരുപക്ഷെ ഉണ്ടായേക്കാം, അതിനെയെല്ലാം അതിജീവിക്കാനും സ്വയം വില നൽകാനും നമ്മൾ ഓരോരുത്തരും പഠിക്കേണ്ടതുണ്ട്.

ഒരുപക്ഷെ മറ്റുള്ളവരെപോലെ കഴിവുകൾ നമ്മൾക്ക് ഉണ്ടായെന്നു വരില്ല, മറ്റുള്ളവരുടെതുപോലെ നേട്ടങ്ങൾ സ്വന്തമാക്കാൻ കഴിഞ്ഞിട്ടുണ്ടാകില്ല, എങ്കിൽ പോലും നമ്മൾക്ക് ഒരു വിലയുണ്ടെന്ന് കരുതാൻ കഴിയേണ്ടതുണ്ട്.

ചില കറികൾ ഉണ്ടാക്കുമ്പോൾ അതിൽ കറിവേപ്പില ഇടാറുണ്ട്, ഭക്ഷിക്കുമ്പോൾ ആ വേപ്പില ഉപയോഗിക്കുന്നില്ലായെങ്കിൽ കൂടിയും കറിക്ക് വേണ്ട സ്വാദിന് കറിവേപ്പിലക്ക് അതിന്റെതായ സ്ഥാനമുണ്ട്.

കണ്ണുള്ളപ്പോൾ കണ്ണിന്റെ വില അറിയില്ലായെന്ന് പറയുമ്പോലെ ഓരോന്നിന്റെയും അഭാവത്തിലാണ് അതിന്റെ വില എത്രത്തോളമാണെന്ന് നമ്മളിൽ പലരും ഒരുപക്ഷെ മനസിലാക്കുക.

നമ്മുടെയൊക്കെ പ്രവർത്തനങ്ങൾ സ്വയം വില ഉയർത്തുന്നതു ആകണം, സ്വയം വില നഷ്ടപ്പെടുത്തുന്നത് ആകരുത്.

ഏതൊരു ജോലിക്കും അതിന്റെതായ മഹത്വമുണ്ട്. നമ്മളെ ഏൽപ്പിച്ച ജോലിക്ക് നിരക്കാത്ത കാര്യങ്ങൾ ചെയ്യുമ്പോൾ സ്വയം വില ഇല്ലാതെയാകുകയാണ്.

പരാജയങ്ങൾ ഉണ്ടാകുമ്പോൾ നമ്മളിൽ പലരും ദുഃഖിതരാകും, ദുഃഖങ്ങൾ നമ്മളെ ഒരുപക്ഷെ മാനസികമായും ശാരീരികമായും തളർത്തിയേക്കാം. സ്വയം വില നൽകി പോസിറ്റീവ് ആയി ചിന്തിച്ചു മുന്നേറാൻ ശ്രമിച്ചെങ്കിൽ മാത്രമേ തളർച്ചകളെ ഇല്ലാതെയാക്കാൻ ഒരുപക്ഷെ കഴിയുകയുള്ളു.

ഈ ലോകത്തിൽ എല്ലാവരാലും ഒറ്റപ്പെട്ടാലും നമ്മൾക്ക് മുന്നോട്ടു പോകാൻ കരുത്തു കിട്ടുന്നത് നമ്മൾക്ക് സ്വയം വില നൽകുമ്പോഴാണ്.

ഇന്നിപ്പോൾ പലർക്കും സ്വയം വില നൽകാൻ സാധിക്കുന്നില്ല. സ്വയം അവരവരെ തന്നെയെങ്കിലും സ്നേഹിക്കാൻ പഠിക്കേണ്ടതുണ്ട്.

സ്വയം വില നൽകാൻ പഠിച്ചില്ലായെന്നുണ്ടെങ്കിൽ ഒരുപക്ഷെ ഒത്തിരിയധികം നഷ്ടങ്ങളെ നേരിടേണ്ടി വന്നേക്കാം.

മറ്റുള്ളവരുടെ ഭാഗത്തു നിന്നുള്ള പെരുമാറ്റം എത്ര മോശമാണെങ്കിൽ കൂടിയും അവരെപോലെ തിരിച്ചും നമ്മൾ അവരോട് പെരുമാറുന്നത് നമ്മുടെ വില നഷ്ടപ്പെടുത്തുന്ന കാര്യമാണ്.

സമയത്തിന്റെ വില മനസിലാക്കുന്നതുപോലെ സ്വയം വില മനസ്സിലാക്കാൻ നമ്മളെകൊണ്ട് സാധിക്കണം.

പലരും പറയുന്ന കാര്യമാണ് എനിക്ക് കഴിവില്ല, ഒന്നും ചെയ്യാൻ അറിയില്ല എന്നൊക്കെ, ഇത്തരം നെഗറ്റീവ് ചിന്താഗതി മാറ്റിയെടുക്കേണ്ടതുണ്ട്, നമ്മളായിട്ട് എന്തെങ്കിലും ശ്രമിച്ചെങ്കിലെ എന്തു നേട്ടമായാലും സ്വന്തമാക്കാൻ കഴിയുകയുള്ളു എന്ന് ഇനിയെങ്കിലും തിരിച്ചറിയുക.

ഈ ഭൂമിയിൽ ജനിച്ചു വീണ ഏതൊരു മനുഷ്യനും അവരുടേതായ കുറവുകൾ ഉണ്ടായെന്നു വരാം, എങ്കിൽ പോലും ഓരോ വ്യക്തികൾക്കും അവരവരുടേതായ വിലയുണ്ട്.

നമ്മൾക്ക് ആരും വില നൽകിയില്ല എങ്കിൽ കൂടിയും സ്വയം വില നൽകുക.

ഇന്നിപ്പോൾ നമ്മൾക്ക് മറ്റുള്ളവരുടെ മുന്നിൽ യാതൊരു വിലയും ഉണ്ടായെന്നു വരില്ല, നാളെകളിൽ നമ്മൾക്ക് മറ്റുള്ളവർ വില നൽകില്ലായെന്ന് ആരു കണ്ടു.

മറ്റുള്ളവർ നമ്മൾക്ക് വില നൽകുകയോ നൽകാതിരിക്കുകയോ ചെയ്യട്ടെ, നമ്മൾക്ക് ചെയ്യാനുള്ള നല്ല പ്രവർത്തികൾ മറ്റുള്ളവർ നമ്മൾക്ക് വേണ്ട വില നൽകിയില്ലായെന്നതിന്റെ പേരിൽ തടസ്സം ആകരുത്.

സ്വർണ്ണത്തിന് വില ഉണ്ട് എന്ന് നമ്മൾക്കു അറിയാം, സ്വർണ്ണം എങ്ങനെയാണ് രൂപപ്പെടുന്നത് എന്നത് നമ്മളിൽ എത്രപേർക്ക് അറിയാം. ഒത്തിരി കടമ്പകൾ കടന്നിട്ടാണ് സ്വർണ്ണം നമ്മൾക്ക് ഉപയോഗിക്കാൻ സാധിക്കു‍ന്നത്.

ദുരിതങ്ങളെ, പ്രയാസങ്ങളെ എല്ലാം പലപ്പോഴും അതിജീവിക്കേണ്ടി വരും, അതെല്ലാം നേരിട്ട് മുന്നേറുന്നവർക്ക് വില ഉണ്ടാവുക സാധ്യമായ കാര്യമാണല്ലോ.

ഈ ലോകത്ത് സമ്പന്നർ ആയവരിൽ പലരും അവരുടെയൊക്കെ ചെറുപ്പത്തിൽ ദാരിദ്ര്യം അനുഭവിക്കേണ്ടി വന്നവരാകാം, അതെല്ലാം നിരന്തരപരിശ്രമം കൊണ്ടു നേരിട്ടുകൊണ്ടാണ് അവർക്കിപ്പോൾ നേട്ടങ്ങൾ സ്വന്തമാക്കാൻ ഒരുപക്ഷെ സാധിച്ചിട്ടുള്ളത്.

നമ്മുടെ പെരുമാറ്റം, പ്രവർത്തികൾ ഒന്നും തന്നെ ആരെയും വേദനിപ്പിക്കുന്നത് ആകാതിരിക്കാൻ നമ്മൾ ഓരോരുത്തരും കഴിവിന്റെ പരമാവധി ശ്രമിക്കുക.

വലിയ മല കിഴടക്കാൻ തുനിഞ്ഞിറങ്ങിയ വ്യക്തി തന്നെകൊണ്ടു ഒരിക്കലും മല കിഴടക്കാൻ സാധിക്കില്ല എന്ന് നിരന്തരം മനസ്സിൽ പറഞ്ഞു കൊണ്ടിരുന്നെങ്കിൽ ഒരുപക്ഷെ മുന്നോട്ട് കാൽ ചുവട് വെക്കാൻ സാധിക്കുമായിരുന്നില്ല.

നേട്ടങ്ങൾ സ്വന്തമാക്കാൻ പരിശ്രമിക്കാൻ മടിവിചാരിച്ചിട്ടു കാര്യമില്ല, ജയവും തോൽവിയും ശ്രമത്തിൽ നിന്നുമാണ് ഉണ്ടാകുക.

ജീവിതത്തിൽ വിജയം കൈവരിക്കാൻ സ്വയം വില നൽകാൻ നമ്മളാരും മറക്കരുത്.

നമ്മൾക്ക് കഴിവില്ല, നമ്മൾ മോശക്കാരാണ് എന്നൊക്കെ നമ്മളോട് പലരും പറയുമ്പോൾ അവരുടെ വാക്കുകൾക്ക് വില നൽകിയാൽ നമ്മുടെ മുന്നോട്ടുള്ള പ്രവർത്തനത്തെ സാരമായി ബാധിക്കും.

ആരു എന്തൊക്കെ നമ്മളെപറ്റി പറഞ്ഞോട്ടെ നമ്മളായിട്ട് നമ്മുടെ വില ഒരിക്കലും നഷ്ടപ്പെടുത്തരുത്. ഒത്തിരിയധികം കഴിവുകൾ നമ്മളിൽ ഉണ്ടെന്ന് തിരിച്ചറിയുക, അതെല്ലാം നമ്മുടെ പരിശ്രമത്തിലൂടെ മുൻപന്തിയിൽ എത്തിക്കാൻ നമ്മളെകൊണ്ട് മാത്രമെ സാധിക്കുള്ളു.

മോശമായ സാഹചര്യങ്ങളെ അതിജീവിച്ചുകൊണ്ട് നല്ല ലക്ഷ്യങ്ങൾ നേടിയെടുക്കാൻ കരുത്തോടെ മുന്നേറാൻ നമ്മൾ എല്ലാവർക്കും ഇനിയെങ്കിലും സ്വയം വില നൽകാൻ സാധിക്കട്ടെ.