ഉണർവിൻ പൊൻകിരണങ്ങൾ:The awakening golden rays-359

ലോകം നിലനിൽക്കുന്നത് മനുഷ്യർ തമ്മിൽ സ്നേഹം ഉള്ളതുകൊണ്ടാണ്.

മനുഷ്യർക്ക് ഏറ്റവും അധികം വേദനക്ക് കാരണമാകുന്നതും സ്നേഹം നഷ്ടപ്പെടുന്നതുകൊണ്ടാണ്.

സ്നേഹിക്കാനും സ്നേഹിക്കപ്പെടാനും എല്ലാ മനുഷ്യരും ആഗ്രഹിക്കുന്നുണ്ട്.

ഇന്നിപ്പോൾ ഒത്തിരി ആളുകളാണ് സ്നേഹം കിട്ടാതെ വിഷമത്തിൽ ആയിരിക്കുക.

സ്നേഹം കിട്ടാതെ പോകുന്ന ഒരാൾക്കുണ്ടാകുന്ന വിഷമം മറ്റൊരാൾക്ക്‌ പലപ്പോഴും മനസ്സിലാകണം എന്നില്ല.

നമ്മുടെ ചുറ്റിലുമുള്ള മനുഷ്യരെ നിസ്വാർത്ഥമായി സ്നേഹിക്കാൻ നമ്മൾക്ക് കഴിയട്ടെ.

പലപ്പോഴും നമ്മളുടെ വേണ്ടപ്പെട്ടവരുടെ സ്നേഹം തിരിച്ചറിയാതെപോകുന്നുണ്ട്, പലർക്കും പല കാരണങ്ങളാൽ യഥാർത്ഥ സ്നേഹം പ്രകടിപ്പിക്കാൻ കഴിയാറില്ല.

സ്നേഹം നഷ്ടപ്പെട്ട അവസ്ഥയിൽ നിന്നും സ്നേഹം ലഭിക്കുന്നിടത്തേക്ക് മനുഷ്യരുടെ മനസ്സ് കടക്കാൻ ആരംഭിക്കും.

മനസ്സ് തുറന്നു നമ്മളുടെ വേണ്ടപ്പെട്ടവരെയെങ്കിലും സ്നേഹിക്കാൻ ശ്രമിക്കുക,എല്ലാ മനുഷ്യരിലും കുറവുകൾ ഉണ്ടെന്ന് മനസിലാക്കുക.

എല്ലാവരിൽ നിന്നും സ്നേഹം നഷ്ടമായ അവസ്ഥയിൽ നിരാശയിൽ കഴിയുന്നവരുണ്ട്, ഒരിടത്തും നിന്നും സ്നേഹം നഷ്ടമായി എന്ന് കരുതി ജീവിതത്തിൽ ഇനി ഒരിക്കൽപോലും സ്നേഹം ലഭിക്കില്ല എന്ന് കരുതാനാവില്ലല്ലോ.

സ്നേഹം എന്നത് വെറും വാക്കിൽ മാത്രം ഒതുക്കേണ്ടതല്ല, പ്രവർത്തിയിൽ കൊണ്ടുവരേണ്ടതാണ്.

നമ്മൾ എന്തിനെ സ്നേഹിക്കുന്നുവോ അതിൽ നിന്നും നമ്മൾ പ്രതീക്ഷിച്ചതുപോലെ തിരിച്ചു ലഭിക്കണം എന്നില്ല.

സ്നേഹത്തിൽ വിള്ളലുകൾ ഉണ്ടായേക്കാം, മുറിപ്പെടുത്തലുകൾ ഉണ്ടായേക്കാം, അതെല്ലാം ക്ഷമിച്ചും സഹിച്ചും പരസ്പരം പൊരുത്തപ്പെട്ടും തിരുത്തേണ്ടവ തിരുത്തിയും മുന്നോട്ട് പോകുക.

നമ്മുടെ വേണ്ടപ്പെട്ടവരെ ആന്മാർഥമായി സ്നേഹിക്കാൻ നമ്മൾക്ക് കഴിയട്ടെ.

മരണം മൂലം നമ്മളിൽ നിന്നും അകന്നുപോകുന്ന മനുഷ്യർ, അവർക്ക് ഇനി നമ്മളെ പ്രത്യക്ഷമായി സ്നേഹിക്കാൻ സാധിക്കില്ലായെങ്കിൽ പോലും നമ്മൾ ജീവിച്ചിരിക്കുന്നിടത്തോളം കാലം അവരുടെ സ്നേഹം നമ്മൾക്ക് ഒരുപക്ഷെ പലപ്പോഴും അനുഭവിച്ചറിയാൻ സാധിക്കും.

തന്റെ ജീവനോളം, സ്വന്തം ജീവനേക്കാൾ അധികമായി മറ്റുള്ളവരെ സ്നേഹിക്കുന്ന മനുഷ്യരുണ്ട് നമ്മുടെ ചുറ്റിലും.

ആപത്തിൽപെട്ടവരെ പരിചയമില്ലാഞ്ഞിട്ടുകൂടി രക്ഷപ്പെടുത്താൻ ശ്രമിച്ച ആളുകൾ, അവരിൽ മനുഷ്യസ്നേഹം നിലനിൽക്കുന്നതുകൊണ്ടാണ് സ്വന്തം ജീവൻ നഷ്ടപ്പെടുത്തിയും അപകടത്തിൽ ആയ വ്യക്തിയെ രക്ഷിക്കാൻ മുന്നിട്ടിറങ്ങിയത്.

പ്രകൃതിയെ സ്നേഹിക്കാൻ നമ്മൾ ഓരോരുത്തരും പരിശ്രമിക്കണം, പ്രകൃതി ഇല്ലെങ്കിൽ മനുഷ്യർക്ക് സുഖപ്രദമായി മുന്നോട്ടു ജീവിക്കാൻ ഒരുപക്ഷെ കഴിയണം എന്നില്ല.

സ്നേഹം ഉള്ളിടത്തെ ഒരുപക്ഷെ ആവശ്യത്തിന് പരിചരണം ഉണ്ടാവുകയുള്ളൂ.

സ്നേഹം ആരിൽ നിന്നും പിടിച്ചുവാങ്ങേണ്ടതല്ലല്ലോ.

നമ്മൾ ചെയ്യുന്ന ഏതൊരു കാര്യവും സ്നേഹത്തോടെ ആകട്ടെ. വെറുപ്പും വിരോധവും ഇല്ലാതെയാക്കാൻ ശ്രമിക്കാം, നമ്മൾ എല്ലാവരും കുറച്ചുകാലം മാത്രം ഈ ഭൂമിയിൽ ജീവിക്കാൻ വന്നവരാണ്, ഒടുവിൽ മണ്ണോടുമണ്ണായി ചെരെണ്ടവരാണ്, നമ്മൾക്ക് ഇന്ന് എന്തെല്ലാമുണ്ടോ അതെല്ലാം നമ്മൾക്കു കിട്ടിയ അനുഗ്രഹമായി കാണുക.

നമ്മൾക്കുള്ളതെന്തും നഷ്ടപ്പെടാൻ നിമിഷനേരം മതി.

ഒരു അമ്മക്ക് സ്വന്തം കുഞ്ഞിനോട് വളരെ അധികം സ്നേഹം ഉണ്ടാവേണ്ടതാണ്. സ്നേഹം കിട്ടി വളരേണ്ടവരാണ് കുഞ്ഞുകുട്ടികൾ.

സ്നേഹം നഷ്ടപ്പെടുന്ന അവസ്ഥ ചിലപ്പോഴൊക്കെ മനുഷ്യരുടെ ഭാവിജീവിതത്തെ വളരെയധികം സാരമായി ബാധിക്കാറുണ്ട്.

എല്ലാവർക്കും ഒരുപോലെ സ്നേഹിക്കാനും സ്നേഹിക്കപ്പെടാനും ആളുകൾ ചുറ്റിലും എല്ലായ്പോഴും ഉണ്ടാകണമെന്നില്ലല്ലോ.

കിട്ടാതെ പോയ സ്നേഹത്തെയോർത്തു ഇനിയുള്ള കാലം വിഷമിച്ചിട്ടു കാര്യം ഇല്ല. അവരവരെ തന്നെ സ്നേഹിക്കാൻ പഠിക്കുക, ലോകം നമ്മളെ സ്നേഹിക്കുന്നു എന്ന് തിരിച്ചറിയുക. നമ്മളിലെ നല്ല കഴിവുകളെ വേണ്ട രീതിയിൽ പുറത്തുകൊണ്ടുവരിക.

ജീവിതത്തിൽ ഒറ്റപ്പെടൽ അനുഭവിക്കേണ്ടി വന്നേക്കാം, അപ്പോഴെല്ലാം നിരാശപ്പെടാതെ അവരവരെ സ്നേഹിക്കുക. നമ്മൾക്കും ഈ ലോകത്തിനുവേണ്ടി ഒത്തിരി നല്ല കാര്യങ്ങൾ ചെയ്യാൻ കഴിയും, അതിനായി ആന്മാർഥമായി പരിശ്രമിക്കുക.

ജീവിതത്തിൽ നമ്മൾക്കു നഷ്ടപ്പെട്ടെന്ന് കരുതിയ സ്നേഹത്തേക്കാൾ എല്ലാം അധികമായി ഒരുപക്ഷെ ഭാവിയിൽ നമ്മൾക്കു ലഭിച്ചെന്ന് വരാം.

കാമുകി കാമുകന്മാർ തമ്മിലുള്ള സ്നേഹം, ഭാര്യ ഭർത്താക്കന്മാർ തമ്മിലുള്ള സ്നേഹം, മാതാപിതാക്കൾ മക്കൾ തമ്മിലുള്ള സ്നേഹം, സഹോദരങ്ങൾ തമ്മിലുള്ള സ്നേഹം, ജോലിയിടങ്ങളിലെ സഹപ്രവർത്തകർ തമ്മിലുള്ള സ്നേഹം അങ്ങനെ ഒരുപാട് സ്നേഹബന്ധങ്ങൾ നമ്മളുടെ ചുറ്റിലും നോക്കിയാൽ കാണാൻ കഴിയും.

നാളിതുവരെ നമ്മൾ ഓരോരുത്തർക്കും ലഭിച്ച സ്നേഹം ഒരുപക്ഷെ നിമിഷനേരം കൊണ്ടു നഷ്ടപ്പെട്ടേക്കാം.നമ്മുടെയൊക്കെ ജീവിതത്തിൽ പലപ്പോഴും സാഹചര്യം അനുസരിച്ചു പലരോടുമുള്ള സ്നേഹം മാറി അവിടേക്ക് വെറുപ്പ് കടന്നുവരികയും, വെറുപ്പ് മാറി സ്നേഹം കടന്നു വരികയും ചെയ്യാറുണ്ട്.

സ്നേഹം നിലനിൽക്കാൻ ക്ഷമയും ത്യാഗവും സഹായവും ഒരുപക്ഷെ വേണ്ടിവന്നേക്കാം.

ലോകം നമ്മൾ ഓരോരുത്തരുടെയും സ്നേഹംകൊണ്ട് നിറയട്ടെ.

നമ്മളിലെ സ്നേഹം എന്നും നഷ്ടപ്പെടാതെ കാത്തുസൂക്ഷിക്കാൻ നമ്മൾ എല്ലാവർക്കും സാധിക്കട്ടെ.