ഉണർവിൻ പൊൻകിരണങ്ങൾ:The awakening golden rays-336

മനുഷ്യർക്ക് ഓരോ നാൾ കഴിയുന്തോറും സംതൃപ്തിയിൽ വ്യത്യാസം വന്നുകൊണ്ടിരിക്കും.

ഒരാൾക്ക് സംതൃപ്തി നൽകുന്ന കാര്യം ആയിരിക്കില്ല മറ്റൊരാൾക്ക്‌ സംതൃപ്തി നൽകുക.

കയ്യിലുള്ള സമ്പാദ്യം അനുസരിച്ചു നമ്മൾ ഓരോരുത്തരും സംതൃപ്തി നേടാൻ ഒരുപക്ഷെ വില കൂടിയ കാര്യങ്ങൾ തിരഞ്ഞെടുക്കും.

നമ്മുടെ ചുറ്റിലുമുള്ള പലരും നമ്മൾ ചെയ്യുന്നതിനെപ്പറ്റി പല അഭിപ്രായം പറയും, അവരുടെ സംതൃപ്തിക്കുവേണ്ടി നമ്മൾ പല കാര്യങ്ങളും ചെയ്യാൻ ഒരുങ്ങിയാൽ നമ്മൾക്ക് പിന്നീട് സംതൃപ്തി ഉണ്ടാകണം എന്നില്ല.

ഇന്നിപ്പോൾ സംതൃപ്തിയോടെ കഴിയാമായിരുന്നിട്ടും മറ്റുള്ളവരുടെ മുൻപിൽ വിലയുളളതായി കാണിക്കാനായി ആർഭാടങ്ങൾ കാണിക്കുകയും പിന്നീട് കടം വന്നു നിരാശയിൽ ജീവിതം മുന്നോട്ട് തള്ളി നിക്കേണ്ടി വരുന്നവരും ഉണ്ട്.

വരവിനു അനുസരിച്ചു മാത്രം ചിലവ് ചെയ്യുക, അനാവശ്യ ചിലവുകൾ പരമാവധി ഒഴിവാക്കുക എങ്കിൽ ഒരുപരിധി വരെ സംതൃപ്തി ലഭിച്ചേക്കാം.

ഭക്ഷണം കഴിക്കുന്നത് സംതൃപ്തിക്ക് ഉപരിയായി നമ്മുടെ ശരീരത്തിന്റെ പ്രവർത്തനം ഉചിതമായ രീതിയിൽ നടക്കുന്നതിനാണ്.

എപ്പോഴും സംതൃപ്തിയോടെ ഭക്ഷണം കഴിക്കാൻ എല്ലാവർക്കും ഒരുപോലെ കഴിഞ്ഞെന്ന് വരില്ലല്ലോ.നമ്മൾ കഴിക്കാൻ ആഗ്രഹിക്കുന്ന ഭക്ഷണം എല്ലായിടത്തും ലഭിക്കണം എന്നില്ലല്ലോ.

ഭക്ഷണം കഴിക്കുമ്പോൾ ഒരുപക്ഷെ സംതൃപ്തി തോന്നിയാലും പിന്നീട് സംതൃപ്തി ലഭിക്കാത്ത അവസ്ഥകൾ ഉണ്ടായേക്കാം.

നമ്മളുടെ ജീവിതത്തിൽ സമയത്തിന് കിട്ടേണ്ട കാര്യങ്ങൾ സമയത്തു തന്നെ കിട്ടിയില്ലെങ്കിൽ അതെല്ലാം ഒരുപക്ഷെ നമ്മളുടെ ജീവിതത്തിൽ സംതൃപ്തിയെ സാരമായി ബാധിച്ചേക്കാം.

എല്ലാ കാര്യത്തിലും എല്ലാം തികഞ്ഞവർ നമ്മൾക്കിടയിൽ ആരും തന്നെയില്ല. നമ്മൾ ചെയ്യുന്ന എല്ലാ കാര്യങ്ങളും എല്ലാവരെയും ഒരുപോലെ എപ്പോഴും സംതൃപ്തിപ്പെടുത്താൻ കഴിഞ്ഞെന്ന് വരില്ല.

കുഞ്ഞുങ്ങൾക്ക് കൊടുക്കുന്ന ഭക്ഷണത്തിന്റെ അളവ് പോരാ മുതിർന്ന വ്യക്തികൾക്ക് കൊടുക്കാനായിട്ട്, ഓരോരുത്തർക്കും അളവ് വ്യത്യാസമുണ്ട്.

നമ്മുടെയൊക്കെ ജീവിതത്തിൽ മറ്റുള്ളവരോട് ദേഷ്യവും വെറുപ്പും മറ്റു മോശമായ ചിന്തകളും ഉണ്ടാകുന്നത്, ഒരുപക്ഷേ നമ്മൾക്ക് കിട്ടേണ്ട രീതിയിൽ സ്നേഹം, പരിഗണന ലഭിക്കാത്തതുകൊണ്ടാകാം.

നമ്മൾ ഓരോരുത്തർക്കും ഇപ്പോൾ ചെയ്യാനാകുക ഉള്ളതിൽ തൃപ്തിപ്പെട്ടു ജീവിക്കുക എന്നതാണ്, അതോടൊപ്പം ജീവിതത്തിൽ ഉയരങ്ങൾ സ്വന്തമാക്കാൻ നിരന്തരം പരിശ്രമിക്കുക എന്നതാണ്.

നമ്മൾക്ക് സംതൃപ്തി നൽകുന്ന പലതും കാലങ്ങൾ കൊണ്ടു നഷ്ടപ്പെട്ടേക്കാം, നഷ്ടങ്ങളെ അതിജീവിച്ചു മുന്നേറാൻ നമ്മൾക്ക് കഴിയണം.

പത്താം ക്ലാസ്സിൽ പഠിക്കുന്ന വിദ്യാർത്ഥിക്കുമുൻപിൽ ഒത്തിരി വിഷയങ്ങൾ പഠിക്കാനുണ്ടാകും, അതെല്ലാം ഒരുപോലെ സംതൃപ്തി നിറഞ്ഞ മനസ്സോടെ പഠിക്കാൻ ഒരുപക്ഷെ എപ്പോഴും സാധിച്ചെന്ന് വരില്ല. ചില വിഷയങ്ങൾ എളുപ്പം മനസ്സിലാക്കാൻ സാധിച്ചാൽ പോലും മറ്റു വിഷയങ്ങൾ അതുപോലെ മനസ്സിലാക്കാൻ കഴിഞ്ഞെന്ന് വരില്ല.

ഒരു എഴുത്തുകാരനെ സംബന്ധിച്ചിടത്തോളം ആ വ്യക്തിയുടെ എഴുത്തുകൾ ആളുകൾക്ക് പ്രയോജനപ്പെടുന്നുണ്ട് എന്ന് വായനക്കാരിൽ നിന്നും കേൾക്കാൻ ഇടവരുന്നത് സംതൃപ്തി നൽകുന്ന കാര്യമാണ്.

ജീവിതത്തിൽ പറ്റുന്നിടത്തോളം കാലം മുന്നോട്ട് പോകാൻ പരിശ്രമിച്ചുകൊണ്ടിരിക്കുക, നമ്മൾ ചെയ്യുന്ന ഓരോ പ്രവർത്തനവും നമ്മുടെ ശരീരത്തിനും മനസ്സിനും സംതൃപ്തി നൽകട്ടെ.

മോശം ശീലങ്ങളിൽ ഏർപ്പെടുന്നവർക്ക് അതിൽ നിന്നും താത്കാലികമായി സംതൃപ്തി ഒരുപക്ഷെ ലഭിക്കുന്നുണ്ടാകാം, മോശം ശീലങ്ങളിൽ നിന്നും ഉണ്ടാകുന്ന ദോഷവശങ്ങൾ എന്തെല്ലാമാണെന്ന് പലരും മനസ്സിലാക്കുന്നില്ല. പലരും പല ന്യായങ്ങളും പറയും, അവർക്ക് അങ്ങനെ ചെയ്തിട്ട് കുഴപ്പമില്ലല്ലോ എന്നൊക്കെ, പക്ഷെ എങ്കിൽ സ്വന്തം ജീവിതത്തിൽ ഒരുപാട് നഷ്ടങ്ങൾ സംഭവിച്ചുകഴിയുമ്പോൾ ആയിരിക്കും ഒരുപക്ഷെ തിരിച്ചറിവുകൾ ഉണ്ടാവുക, അപ്പോഴേക്കും ആരോഗ്യം നഷ്ടപ്പെട്ടെന്ന് വന്നേക്കാം.

ഇന്നിപ്പോൾ ഒത്തിരി മായങ്ങൾ ഭക്ഷണത്തിൽ കലരുന്നുണ്ട്, പഴക്കം ചെന്ന ഭക്ഷണം കഴിച്ചു ആളുകളുടെ ആരോഗ്യസ്ഥിതി വളരെ അധികം മോശമാകുകയും അപൂർവം സന്ദർഭങ്ങളിൽ മരണം വരെ സംഭവിക്കുകയും ചെയ്തിട്ടുണ്ട്.

ചെയ്യുന്ന ജോലിയിൽ സംതൃപ്തി ഇല്ലാത്തവരുണ്ട്, കിട്ടുന്ന ശമ്പളത്തിൽ സംതൃപ്തി ഇല്ലാത്തവരുണ്ട്, മുന്നോട്ട് ചെയ്യാനുള്ള ഓരോ കാര്യത്തിലും സംതൃപ്തി ഇല്ലാത്തവരുണ്ട്.

എല്ലാവർക്കും പറയാൻ അവരുടേതായ കാരണങ്ങൾ ഒരുപാട് ഉണ്ടാകും.

മറ്റുള്ളവരുമായി താരതമ്യം ചെയ്താൽ ഒരിക്കലും നമ്മൾക്ക് സംതൃപ്തിയോടെ ജീവിതം മുന്നോട്ട് കൊണ്ടുപോകാൻ ഒരുപക്ഷെ കഴിഞ്ഞെന്ന് വരില്ല.

എത്രയധികം സമ്പാദ്യം ഉണ്ടെങ്കിലും സംതൃപ്തി ലഭിക്കണമെന്ന് യാതൊരു നിർബന്ധവും ഇല്ല.

ഉയർന്ന ശമ്പളവും ചെയ്യാൻ കാര്യമായ ജോലി ഇല്ലെങ്കിൽ സംതൃപ്തി ചിലർക്കെങ്കിലും നഷ്ടപെട്ടേക്കാം.

ഒരിക്കൽ ബസിൽ യാത്ര ചെയ്യവേ സാധാരണ നിരക്കിനെക്കാൾ കൂടുതൽ തുക കണ്ടക്ടർ വാങ്ങിച്ചു, അതിന്റെ കാരണം ഞാൻ ചോദിച്ചു അപ്പോഴാണ് ആ ബസ് സ്പെഷ്യൽ സർവീസ് നടത്തുന്നതാണെന്ന് പറയുന്നത്, ആ മറുപടി എന്നിൽ സംതൃപ്തി നൽകി, ഇല്ലെങ്കിൽ ഞാൻ, കണ്ടക്ടർക്ക് എനിക്ക് ചില്ലറ ബാക്കി തരാനുള്ള ബുദ്ധിമുട്ട് കൊണ്ടു കൂടുതൽ തുകക്കുള്ള ടിക്കറ്റ് നൽകിയതാണെന്ന് വിചാരിച്ചേനെ.

ഒരു കർഷകൻ അയാളുടെ ജീവിതത്തിലെ സംതൃപ്തിയെ പറ്റി പറഞ്ഞത് താൻ നട്ടുവളർത്തിയ ചെടിയിൽ ഫലങ്ങൾ ഉണ്ടായി കാണുന്നതാണെന്ന്, അന്നേരം ആ വ്യക്തിയുടെ മനസ്സിലെ വിഷമങ്ങൾ അകലുമെന്നാണ്.

അദ്ധ്യാപകർക്കു അവരുടെ വിദ്യാർത്ഥികൾ നേടുന്ന വിജയം ആയിരിക്കും ഒരുപക്ഷെ സംതൃപ്തിക്ക് നിദാനം.

ഓരോരുത്തർക്കും അവരവരുടെ മേഖലയിൽ സംതൃപ്തിക്ക് ഒരുപാട് കാര്യങ്ങളെ ആശ്രയിച്ചിരിക്കുന്നു.

ചിലർക്ക് സമ്പാദ്യം ഒരുപാട് ഉണ്ടെങ്കിലും വലിയ സൗകര്യം ഒന്നും വേണമെന്നില്ല സംതൃപ്തി ലഭിക്കാൻ, അവരുടെ ജീവിതത്തിൽ അവർ ഓരോരുത്തരും വളർന്നു വന്ന സാഹചര്യങ്ങൾ അവരുടെ സംതൃപ്തിക്ക് പരിധി നിശ്ചയിച്ചിട്ടുണ്ട്.

ഇന്നിപ്പോൾ ഒത്തിരി സമ്പന്നർ, അവരുടെ പണം ഉപയോഗിച്ച് ഒത്തിരി പാവപ്പെട്ട ആളുകളെ സഹായിക്കുന്നു, കാരണം അവർക്ക് സംതൃപ്തി നൽകുന്ന കാര്യമാണ് അതൊക്കെ എന്നതുകൊണ്ടാണ്.

നമ്മുടെ ജീവിതം കുറേകൂടി മെച്ചപ്പെടുത്താൻ നിരന്തരം ശ്രമിച്ചുകൊണ്ടിരിക്കുക.

കാലം കഴിയുന്തോറും സംതൃപ്തിക്ക് പരിധികൾ മാറിമറിയും. ഒരിക്കലും പണ്ടുണ്ടായ സംതൃപ്തി എല്ലായ്പോഴും തിരിച്ചു കിട്ടുകയില്ല.

നമ്മളുടെ പരിശ്രമം കൊണ്ടു നമ്മൾക്കും നമ്മളുടെ ചുറ്റിലുമുള്ളവർക്കും സന്തോഷം നൽകികൊണ്ട് സംതൃപ്തി നിറഞ്ഞ ജീവിതം നയിക്കാൻ നമ്മൾ എല്ലാവർക്കും കഴിയട്ടെ.