ഉണർവിൻ പൊൻകിരണങ്ങൾ:The awakening golden rays-332

ആരൊക്കെ എത്ര അഭ്യർത്ഥിച്ചാലും നമ്മൾ ഓരോരുത്തർക്കും ഇഷ്ടം ഉള്ള കാര്യങ്ങൾ ശ്രദ്ധിക്കാനാണ് കൂടുതൽ താല്പര്യം.

ആവശ്യകാര്യങ്ങളിൽ വേണ്ടത്ര ശ്രദ്ധയുണ്ടായില്ലായെന്നുണ്ടെങ്കിൽ ഒരുപാട് വേദനകളും ദുരിതങ്ങളും നമ്മളെ ഒരുപക്ഷെ കാത്തിരിക്കുന്നുണ്ടാകും.

മാനസികമായ, ശാരീരികമായ, ഭൗതികമായ ദുഃഖങ്ങൾ നമ്മളെ അലട്ടുമ്പോൾ പലപ്പോഴും നമ്മുടെ ചുറ്റിലുമുള്ള കാര്യങ്ങളിൽ വേണ്ടത്ര ശ്രദ്ധിക്കാൻ കഴിയാതെയായേക്കാം.

പല കാരണങ്ങൾ ശ്രദ്ധയില്ലായ്മക്ക് പിന്നിലുണ്ടാകാം, അതിന്റെ കാരണങ്ങൾ കണ്ടെത്തി ശരിയായ വിധത്തിൽ പരിഹരിക്കാൻ ശ്രമിക്കേണ്ടതുണ്ട്, അതിനു ഒരുപക്ഷെ വിദഗ്ധരുടെ സഹായം ആവശ്യമായി വന്നേക്കാം.

നമ്മളുടെ ജീവിതത്തിൽ ഒരുപാട് തെറ്റുകൾ ആവർത്തിച്ചു വരുത്തുന്നത് വേണ്ടത്ര ശ്രദ്ധയില്ലാത്തതുകൊണ്ടാണ്.

നമ്മളിൽ പലരും കഴിഞ്ഞുപോയ സംഭവങ്ങളിൽ വേണ്ടത്ര ശ്രദ്ധ നൽകിയിരുന്നുവെങ്കിൽ ഒരുപക്ഷെ നഷ്ടം സംഭവിക്കുക ഇല്ലായിരുന്നുവെന്ന് പിന്നീട് പല കാര്യത്തിലും ആലോചിക്കാറുണ്ട്.

ഏതൊരു മനുഷ്യനും ഒരേ സമയം ശ്രദ്ധ കൊടുക്കാൻ കഴിയുന്ന കാര്യങ്ങൾക്ക് പരിമിതികളുണ്ട്.

വാഹനം ഓടിക്കുന്ന വ്യക്തിയുടെ ശ്രദ്ധ മുഴുവൻ വാഹനത്തിന്റെ മുൻപിൽ തടസ്സങ്ങൾ ഒന്നും ഇല്ലായെന്ന് ഉറപ്പ് വരുത്തുന്നതിലായിരിക്കണം,കൂടാതെ വാഹനം ഗതാഗത യോഗ്യം ആണോ എന്ന് ഉറപ്പുവരുത്തേണ്ടതുണ്ട് ഇല്ലായെന്നുണ്ടെങ്കിൽ അപകടം ഏതു നിമിഷവും മുന്നറിയിപ്പ് നൽകാതെ ഒരുപക്ഷെ സംഭവിച്ചേക്കാം.

ക്ലാസ്സിൽ അദ്ധ്യാപകർ പഠിപ്പിക്കുന്നത് മനസ്സിലാകണം എങ്കിൽ പരിപൂർണ്ണ ശ്രദ്ധ പഠിപ്പിക്കുന്ന വിഷയത്തിന് നൽകേണ്ടതുണ്ട്.

എന്തു ജോലിക്കും അതിന്റെതായ ശ്രദ്ധ ആവശ്യമാണ്.

ഓരോ പരസ്യവും തയ്യാറാക്കുമ്പോൾ ഏറ്റവും കൂടുതൽ ശ്രദ്ധിക്കുക പരസ്യം കാണുന്ന ആളുകളുടെ ശ്രദ്ധ എങ്ങനെ ആ പരസ്യത്തിലേക്ക് എളുപ്പം പിടിച്ചുപറ്റാം എന്നതാണ്.

നമ്മൾ ഓരോരുത്തർക്കും നമ്മുടെ ചുറ്റിലും നടക്കുന്ന കാര്യങ്ങളിൽ ശ്രദ്ധ നൽകുന്നതിൽ പരിമിതികൾ ഉണ്ട്, കുഞ്ഞു കുട്ടികൾക്ക് അപകടങ്ങൾക്ക് കാരണമായവ എന്തൊക്കെയാണെന്ന് തിരിച്ചറിയാൻ പെട്ടെന്ന് തന്നെ സാധിച്ചെന്നുവരില്ലല്ലോ.മുതിർന്നവർ വേണം വേണ്ടത്ര ശ്രദ്ധ നൽകാൻ.

ഇന്ന് ഒരുപാട് മനുഷ്യർ ഒറ്റപ്പെടലിന്റെ വേദന അനുഭവിക്കുന്നുണ്ട്, തങ്ങളെ ശ്രദ്ധിക്കാൻ ആരുമില്ല എന്നൊരു തോന്നൽ വളരെ അധികം വിഷമത്തിന് കാരണം ആയേക്കാം.

ഭാവിയെപറ്റി ചിന്തിച്ചു ആകുലപ്പെടുന്നവരുണ്ട്, ഇന്ന് ഈ നിമിഷം എങ്ങനെ സന്തോഷപ്രദം ആക്കാൻ കഴിയും എന്നതിൽ പരിപൂർണ്ണ ശ്രദ്ധ നൽകാൻ ശ്രമിക്കുക.

ആദ്യമായി ചെയ്യുന്ന കാര്യങ്ങളിൽ തെറ്റുകൾ പറ്റുക സ്വാഭാവികമാണ്, അന്നേരം പലരും ആശ്വസിപ്പിക്കാൻ പറയും സാരമില്ല ഇനിയെങ്കിലും വേണ്ടത്ര ശ്രദ്ധ നൽകാൻ.

വേണ്ടപ്പെട്ടവരെ വേണ്ടതുപോലെ ശ്രദ്ധിക്കാത്തത് പരസ്പരം പിണക്കങ്ങൾക്ക് കാരണമായേക്കാം.

ഭക്ഷണം പാചകം ചെയ്യുമ്പോൾ അതിൽ ചേർക്കേണ്ട കൂട്ടുകൾ കൃത്യമായി തന്നെ ചേർക്കാൻ ശ്രദ്ധിക്കേണ്ടതുണ്ട്, ഇല്ലായെന്നുണ്ടെങ്കിൽ ഭക്ഷണത്തിന്റെ രുചി നഷ്ടപ്പെട്ടേക്കാം.

നിരന്തരമായ പരിശീലനം ശ്രദ്ധ വേണ്ട വിഷയങ്ങൾക്ക് നൽകുക.

ഇന്നലെകളിൽ നമ്മുടെ അശ്രദ്ധമൂലം ഉണ്ടായ നഷ്ടങ്ങൾ ഇനിയും ആവർത്തിക്കാതിരിക്കാൻ ആവശ്യമായ കാര്യങ്ങളിൽ വേണ്ടത്ര ശ്രദ്ധ നൽകാൻ നമ്മൾ ഓരോരുത്തർക്കും ഇനിയുള്ള സമയം ശ്രമിക്കാം.

ജീവിതത്തിൽ നേടേണ്ട ലക്ഷ്യങ്ങൾക്ക് ശ്രദ്ധ കൊടുക്കാൻ നമ്മൾ ഓരോരുത്തർക്കും ഇനിയുള്ള കാലം സാധിക്കട്ടെ.