ഉണർവിൻ പൊൻകിരണങ്ങൾ:The awakening golden rays-326

ജീവിതത്തിൽ നമ്മൾ ഓരോരുത്തരും എടുക്കുന്ന തീരുമാനമാണ് നമ്മളെ ഓരോരുത്തരെയും മുന്നോട്ട് നയിക്കുന്നത്.

തെറ്റായ തീരുമാനം പലപ്പോഴും നമ്മുടെയൊക്കെ ജീവിതം ദുരിതത്തിൽ ആക്കിയേക്കും.

നമ്മൾ തീരുമാനിക്കുന്ന ഓരോ കാര്യത്തിന്റെയും അനന്തരഫലം നമ്മൾ തന്നെയാണ് പലപ്പോഴും അനുഭവിക്കേണ്ടി വരിക.

ശരിയായ സമയത്തു ഉചിതമായ തീരുമാനം എടുക്കാൻ കഴിഞ്ഞാൽ ജീവിതത്തിൽ ഉയർച്ചകൾ ഉണ്ടാകും.

തീരുമാനിക്കാൻ സമയം കിട്ടാതെപോകുന്ന സന്ദർഭങ്ങൾ ഉണ്ടാകാറുണ്ട്.

നമ്മളിൽ പലർക്കും പലപ്പോഴും നമ്മൾ എടുക്കുന്ന തീരുമാനം ശരിയാണോ തെറ്റാണോ എന്നൊക്കെ മുൻകൂട്ടി കാണാൻ ഒരുപക്ഷെ കഴിഞ്ഞെന്ന് വരില്ല.

മുന്നോട്ടുള്ള ജീവിതം നമ്മൾക്ക് മുൻപിൽ പലപ്പോഴും ചോദ്യചിഹ്നം ആയി മാറാറുണ്ട്, അന്നേരം നമ്മൾക്ക് ജീവിതത്തിൽ ശരിയായ തീരുമാനം എടുക്കാൻ കഴിയാതെ പോകാറുണ്ട്.

പ്രതിസന്ധികളെ, ദുരിതങ്ങളെ അതിജീവിക്കുക എന്ന് പറയുന്നത് ഒരുപക്ഷെ അത്ര എളുപ്പമല്ല. പലരും ജീവിതത്തിൽ തളർന്ന, തകർന്ന അവസ്ഥകളിൽ നിന്നും ഉയിർത്തെഴുന്നേറ്റിട്ടുണ്ടെങ്കിൽ അതിന്റെ പിന്നിൽ വിജയിക്കണം എന്നുള്ള ഉറച്ച തീരുമാനം അവരൊക്കെ എടുത്തിട്ടുള്ളതുകൊണ്ടാണ്.

മുന്നോട്ടുള്ള വഴികളിൽ, ഏതു വഴികളിലൂടെ സഞ്ചാരിക്കണമെന്ന് തീരുമാനം എടുക്കാൻ പലപ്പോഴും നമ്മൾ ആശയകുഴപ്പത്തിൽ ആകാറുണ്ട്.

മറ്റുള്ളവരുടെ ജീവിതത്തിൽ ഉണ്ടായിട്ടുള്ള വിജയം കണ്ടുകൊണ്ട് അവരെപോലെ നമ്മളും ചെയ്താൽ വിജയം ഉണ്ടാകണം എന്നില്ല.

നമ്മളിൽ പലരും നല്ലൊരു ജോലി ഉപേക്ഷിക്കാറുണ്ട് നമ്മുടെയൊക്കെ അഭിരുചിക്കിണങ്ങിയ ജോലി ചെയ്യുന്നതിനുവേണ്ടി, പലപ്പോഴും നല്ല ശമ്പളം കിട്ടിക്കൊണ്ടിരിക്കുന്ന ജോലി ആയിരിക്കും അതിനായി ഉപേക്ഷിക്കുക, അതുകാണുമ്പോൾ ചുറ്റിലുമുള്ളവർ പലരും പറയുക മണ്ടത്തരമാണ് എന്നൊക്കെയാണ്. പക്ഷെ എങ്കിൽ അവരിൽ പലരും തങ്ങളുടെ തീരുമാനത്തിൽ ഉറച്ചു മുന്നോട്ട് പോയി വിജയം നേടിയെടുത്തത് കാണാൻ സാധിക്കും, അവർക്ക് അത്രമാത്രം ആന്മവിശ്വാസം ചെയ്യുന്ന കാര്യത്തിൽ ഉണ്ടായതുകൊണ്ടാണ്.

നമ്മൾക്ക് ചുറ്റിലും ഒത്തിരി അവസരങ്ങളുണ്ട്, ആ അവസരങ്ങൾ നമ്മൾ അന്വേഷിച്ചു കണ്ടെത്തണം എന്ന് മാത്രം.

ജീവിതത്തിൽ എടുക്കേണ്ട നിർണ്ണായക തീരുമാനമാണ് നമ്മുടെയൊക്കെ ജീവിതത്തെ അടിമുടി മാറ്റിമറിക്കുന്നത്.

നമ്മൾ ഇന്ന് കാണുന്ന വലിയ ധനികർ അവരുടെ ജീവിതത്തിൽ കൈകൊണ്ട തീരുമാനമാണ് അവരെ ഉയർച്ചയിൽ എത്തിച്ചത്. പരാജയങ്ങൾ നേരിടേണ്ടി വന്നപ്പോഴും തളരാതെ മുന്നോട്ട് പോകാൻ അവർ കാണിച്ച മനസ്സാണ് അവരെ വിജയത്തിൽ എത്തിച്ചത്.

ജീവിതത്തിൽ നമ്മൾക്ക് എന്തെല്ലാം പ്രതിസന്ധികൾ, ദുരിതങ്ങളാണ് ഭാവിയിൽ നേരിടേണ്ടി വരിക എന്നൊന്നും  മുൻകൂട്ടി പറയാൻ ആർക്കും സാധിച്ചെന്ന് വരില്ല.

വെല്ലുവിളികളെ അതിജീവിച്ചു മുന്നോട്ട് പോകുവാൻ ഉചിതമായ തീരുമാനം നമ്മൾ ഓരോരുത്തരും യഥാസമയം എടുക്കേണ്ടതുണ്ട്.

ജീവിതത്തിൽ ഓരോ പ്രായത്തിനു അനുസരിച്ചു എടുക്കേണ്ട തീരുമാനങ്ങളുണ്ട്, അത് വൈകുന്തോറും നമ്മുടെ ജീവിതത്തിൽ അതിന്റെതായ കുറവുകൾ ഒരുപക്ഷെ ഉണ്ടായെന്നു വരാം.

ഓരോരുത്തരുടെയും ജീവിതം മുന്നോട്ട് എങ്ങനെ കൊണ്ടുപോകണമെന്ന് ഓരോരുത്തർക്കും വ്യക്തിപരമായ തീരുമാനമുണ്ടാകും.

നമ്മൾ എടുത്ത തീരുമാനങ്ങൾ ശരിയായ ദിശയിൽ തന്നെയാണോ എന്ന് ഇടക്കിടക്ക് പരിശോധിക്കുക.

ജീവിതത്തിൽ എപ്പോഴും നല്ല തീരുമാനങ്ങൾ എടുക്കാൻ എല്ലാവർക്കും സാധിക്കട്ടെ.