ഉണർവിൻ പൊൻകിരണങ്ങൾ:The awakening golden rays-312

നമ്മളിൽ പലർക്കും പലപ്പോഴും വിഷമങ്ങൾ ഉണ്ടാവാറുണ്ട്. വിഷമത്തെ അതിജീവിക്കാൻ നമ്മൾ എല്ലാവരും തന്നെ പലപ്പോഴും വളരെയധികം കഷ്ടപ്പെടുന്നുണ്ട്.

പലപ്പോഴും നമ്മളെ ഏറ്റവും അധികം വിഷമിപ്പിക്കുക ഒരുപക്ഷെ നമ്മൾ ഏറെ സ്നേഹിക്കുന്ന വ്യക്തികൾ നമ്മളെ ഒറ്റപ്പെടുത്തുമ്പോഴായിരിക്കും, അനാവശ്യമായി കുറ്റപ്പെടുത്തുമ്പോഴായിരിക്കും.

ജീവിതത്തിൽ എപ്പോഴെങ്കിലും ഏതെങ്കിലും വിഷമത്തിലൂടെ കടന്നുപോകാത്തവർ ആയിട്ട് നമ്മളിൽ ആരും തന്നെ ഉണ്ടാകില്ലല്ലോ.

ചെറുപ്പത്തിൽ ഉണ്ടായിരുന്ന പല വിഷമങ്ങളും മുതിർന്നപ്പോൾ നമ്മളെ അതേരീതിയിൽ വിഷമിപ്പിച്ചെന്ന് വരത്തില്ല.

ഓരോ മനുഷ്യർക്കും അവരുടെ ജീവിതത്തിൽ വിഷമിക്കാൻ തക്ക ഒത്തിരി കാരണങ്ങൾ ഒരുപക്ഷെ ഉണ്ടാകാം.

നമ്മൾ കാരണം മറ്റു പലരും ഒരുപക്ഷെ പല സാഹചര്യത്തിലും വിഷമിച്ചിട്ടുണ്ടാകാം.

നമ്മൾ ഏതെങ്കിലും തരത്തിലുള്ള വിഷമം എപ്പോഴെങ്കിലും അനുഭവിച്ചവർ ആണെങ്കിൽ വളരെ പെട്ടെന്ന് തന്നെ നമ്മുടെ ചുറ്റിലും അതേ വിഷമത്തിലൂടെ കടന്നുപോകുന്നവരുടെ വിഷമവും എളുപ്പം മനസ്സിലാക്കാൻ ഒരുപക്ഷെ സാധിച്ചെന്നിരിക്കും.

ഒരാൾക്ക് വിഷമം ഉണ്ടെന്ന് പലപ്പോഴും ഒരുപക്ഷെ നമ്മൾ തിരിച്ചറിയുക അയാളുടെ ബാഹ്യമായ ഇടപെടലുകളിൽ, മുഖഭാവത്തിൽ, സംസാരത്തിൽ ഉണ്ടാകുന്ന കാര്യമായ മാറ്റങ്ങളിലൂടെയാണ്.

വിഷമത്തെ അതിജീവിക്കാൻ ശരിയായ വഴികളെ മാത്രം ആശ്രയിക്കുക, തെറ്റായ വഴികൾ നമ്മളിലെ വിഷമങ്ങളെ വർധിപ്പിക്കുക മാത്രമേ ചെയ്യുകയുള്ളൂ, അതൊരിക്കലും നമ്മളുടെ വിഷമത്തിന് സ്ഥിരമായ പരിഹാരം ആകില്ല.

നമ്മളുമായി ഇടപെടൽ നടത്തുന്ന മറ്റുള്ളവരുടെ വിഷമം ആവശ്യമെങ്കിൽ മനസ്സിലാക്കാൻ നമ്മൾക്ക് കഴിയണം.

മറ്റുള്ളവരുടെ വിഷമം മനസ്സിലാക്കാൻ നമ്മളിൽ പലരും ശ്രമിക്കാറില്ല. ഒരുപക്ഷെ അവർ അനുഭവിക്കുന്ന വിഷമങ്ങൾ നമ്മുടെ ജീവിതത്തിലും നാളെകളിൽ ഉണ്ടായെന്നു വന്നേക്കാം.

പലർക്കും തിരിച്ചറിവുകൾ ഉണ്ടാകാൻ വിഷമങ്ങൾ വളരെയേറെ സഹായിക്കുന്നുണ്ട്.പലരുടെ ജീവിതത്തിൽ ഉണ്ടായിട്ടുള്ള വളർച്ചകൾക്ക് പിന്നിലും അവരുടെ ജീവിതത്തിൽ അനുഭവിച്ച വിഷമങ്ങളാണ്.

ഏതൊരാൾക്കും വിഷമങ്ങൾ ഉണ്ടാകാൻ തക്കതായ കാരണങ്ങൾ ഉണ്ടാകും.

ചില വിഷമങ്ങൾ നമ്മളുടെ ജീവിതത്തിൽ നിന്നും ഒരിക്കൽപോലും മാറ്റിനിർത്താൻ സാധിക്കത്തില്ല.ഒരു കുഞ്ഞു ഈ ഭൂമിയിൽ പിറന്നുവിഴാൻ ആ കുഞ്ഞിന്റെ അമ്മ ഒരുപാട് വിഷമങ്ങൾ സഹിക്കേണ്ടി വരുന്നുണ്ടല്ലോ.

ജനിച്ചാൽ ഒരുനാൾ മരണമുണ്ട്, വേണ്ടപ്പെട്ട പലരുടെയും മരണം നമ്മളിൽ പലർക്കും വിഷമം ഉളവാക്കുന്നതാണ്. മരണം ഏതു നിമിഷവും ആരുടെയും ജീവിതത്തിൽ കടന്നുവരാം. 

എത്ര വലിയൊരു സമ്പന്നനും മരണമുണ്ട്, മരണം പ്രകൃതി നിയമമാണ്.

നമ്മൾ അനുഭവിക്കുന്ന വിഷമത്തെ നേരായ വഴിക്ക് അതിജീവിച്ചെങ്കിൽ മാത്രമേ മുന്നോട്ടുള്ള യാത്ര സുഗമമാകുള്ളൂ.

ഒരുപക്ഷെ കാലങ്ങൾ ഒത്തിരി വേണ്ടി വന്നേക്കാം നമ്മുടെയൊക്കെ വിഷമങ്ങൾക്ക് അവസാനം ഉണ്ടാകാൻ.

എല്ലാ മനുഷ്യരും അധ്വാനിക്കുന്നത് സ്വന്തം/അപരന്റെ ജീവിതത്തിൽ അനുഭവിക്കുന്ന വിഷമങ്ങൾക്ക് പരിഹാരം ലഭിക്കാനാണ്.

പല വിഷമങ്ങളും തുടക്കത്തിൽ മാത്രമാണ് നമ്മളെ പ്രയാസപ്പെടുത്താറുള്ളു, വിഷമങ്ങൾ ശീലമായി കഴിഞ്ഞാൽ അതിനെയെല്ലാം ധിരതയോടെ നേരിടാനുള്ള കഴിവ് ഒരുപക്ഷെ നമ്മളിൽ പലർക്കും നേടിയെടുക്കാൻ കഴിഞ്ഞേക്കും.

നാളെകളെ ഓർത്തു ആകുലപ്പെട്ടിരുന്നാൽ ഇന്ന് ഈ നിമിഷം ഫലപ്രദമായി വിനിയോഗിക്കാൻ ഒരുപക്ഷെ സാധിച്ചെന്ന് വരത്തില്ല.

വിഷമങ്ങളെ ഒരു ഭാഗത്തു ഇറക്കിവെച്ചിട്ട് നേട്ടങ്ങൾക്കായി ശക്തമായി തന്നെ പരിശ്രമിച്ചു മുന്നോട്ട് പോകാൻ ശ്രമിക്കുക.

ഓരോ കാലഘട്ടത്തിൽ അനുഭവിക്കുന്ന വിഷമങ്ങളെ അതിജീവിക്കാൻ നമ്മൾ എല്ലാവരും പഠിക്കേണ്ടിയിരിക്കുന്നു, ജീവിതത്തിൽ ഉണ്ടായ തെറ്റുകൾ വീണ്ടും വരുത്താതിരിക്കാൻ തെറ്റുകൾ തിരുത്തേണ്ടിയിരിക്കുന്നു.

നമ്മൾ നേരിട്ടുകൊണ്ടിരിക്കുന്ന എല്ലാ വിഷമങ്ങൾക്കും വേണ്ടപ്പെട്ടവരുടെ സഹായത്തോടെ ശരിയായ വിധത്തിലുള്ള പരിഹാരം കണ്ടെത്താൻ സാധിക്കട്ടെ.