ഉണർവിൻ പൊൻകിരണങ്ങൾ:The awakening golden rays-215

നേട്ടങ്ങൾ നമ്മുടെയൊക്കെ ജീവിതത്തിൽ ഉണ്ടാവണം എങ്കിൽ അധ്വാനിക്കാതെ സാധിക്കില്ലല്ലോ.

ഏതു മേഖലയിൽ ഏതു തരത്തിലുള്ള നേട്ടമാണ് വേണ്ടതെന്നു നമ്മൾ ഓരോരുത്തരും തീരുമാനിക്കേണ്ടതുണ്ട്.

ഒരു ഭാഗത്തു നേട്ടങ്ങൾ ഉണ്ടാകുന്നതോടൊപ്പം മറ്റു പല മേഖലയിലും നഷ്ടങ്ങൾ ഉണ്ടായെന്നു വന്നേക്കാം.

നേട്ടങ്ങൾ നമ്മൾക്ക് ഒരുപാട് സന്തോഷവും സംതൃപ്തിയും നൽകിയേക്കാം.

നേട്ടങ്ങളിൽ മതിമറന്നു മുന്നോട്ടു ഒന്നും ചെയ്യാതിരിക്കരുത്.

അലസത ഒഴിവാക്കിയാൽ മാത്രമേ നേട്ടങ്ങൾ സ്വന്തമാക്കാൻ സാധിക്കുകയുള്ളു.

നേട്ടങ്ങൾക്ക് അതിന്റെതായ കഷ്ടപ്പാടുണ്ട്. നേട്ടം ആർക്കും എളുപ്പത്തിൽ സ്വന്തമാക്കാൻ എല്ലായ്പോഴും കഴിഞ്ഞെന്ന് വരത്തില്ല.

ഏതു മനുഷ്യനായാലും എല്ലാ നേട്ടങ്ങളും ഈ ലോകത്തിൽ സ്വന്തമാക്കാൻ കഴിയില്ലല്ലോ.

പല നേട്ടങ്ങളും ഒരുപക്ഷെ വളരെയധികം വൈകിയായിരിക്കും നമ്മുടെയൊക്കെ ജീവിതത്തിൽ ഉണ്ടാവുക.

നമ്മൾ നാളിതുവരെയായി എന്തൊക്കെ നേടി എന്നത് നമ്മളുടെ കാര്യത്തിൽ ശ്രദ്ധയുള്ളവർ പലപ്പോഴും അന്വേഷിക്കാറുണ്ട്.

നേട്ടങ്ങൾ ഒന്നും ഇല്ലെങ്കിൽ പിന്നെ എന്തിനാണ് ഓരോ കാര്യവും ചെയ്യുന്നതെന്ന് വരെ നമ്മുടെ ചുറ്റിലുമുള്ളവർ ചോദിച്ചേക്കാം.

സ്വന്തം ജീവിതത്തിൽ നേട്ടങ്ങൾ ഉണ്ടാക്കാൻ കഴിഞ്ഞില്ലായെങ്കിൽ കൂടിയും നമ്മുടെ പരിശ്രമം മറ്റു പലർക്കും നേട്ടത്തിന് കാരണം ആയേക്കാം.

നമ്മൾക്ക് നേട്ടങ്ങൾ സ്വന്തമാക്കാൻ കഴിഞ്ഞില്ല അതുകൊണ്ട് മറ്റുള്ളവർക്കും നേട്ടങ്ങൾ നേടാൻ സഹായിക്കേണ്ടതില്ല എന്ന് തീരുമാനിക്കുന്നത് നല്ല കാര്യമല്ലല്ലോ.

സ്വന്തം ജീവിതത്തിൽ നേടാൻ കഴിയാതെപോയത് പലതും തങ്ങളുടെ മക്കളിലൂടെ, വേണ്ടപ്പെട്ടവരിലുടെ നേടിയെടുക്കണം എന്ന് ആഗ്രഹിക്കുന്നവരുണ്ടാകാം. ഒരിക്കലും നമ്മുടെ ആഗ്രഹങ്ങൾ മക്കളിലേക്ക്, മറ്റുള്ളവരിലേക്ക് അടിച്ചേൽപ്പിക്കരുത്, അവർ ഓരോരുത്തർക്കും അവരുടേതായ സ്വപ്നങ്ങളും ആഗ്രഹങ്ങളും ഒരുപക്ഷെ ഉണ്ടായേക്കാം.

ഒരുപാട് ആളുകളുടെ സ്വപ്നങ്ങൾ വേണ്ടപ്പെട്ടവരുടെ തടസ്സങ്ങൾ മൂലം നഷ്ടപ്പെടുത്തേണ്ടി വന്നിട്ടുണ്ട്.

നമ്മുടെ ചുറ്റിലുമുള്ളവർക്ക് നേട്ടങ്ങൾ ലഭിക്കുമ്പോൾ അവരെ അഭിനന്ദിക്കാൻ, കൂടുതൽ നല്ല നേട്ടങ്ങൾക്കായി പ്രോത്സാഹനം നൽകാനും മറക്കരുത്.

നമ്മളിലെ കഴിവുകളെ വളർത്തികൊണ്ട് വന്നാലേ പല മേഖലയിലും നേട്ടങ്ങൾ സ്വന്തമാക്കാൻ കഴിയുകയുള്ളു.

മറ്റുള്ളവരെപോലെ നേട്ടങ്ങൾ സ്വന്തമാക്കാൻ കഴിഞ്ഞില്ലായെന്ന് കരുതി ദുഃഖിച്ചു തളരാതിരിക്കുക.

ഒരുപാട് ആളുകൾ മറ്റുള്ളവരെപോലെ നേട്ടങ്ങൾ സ്വന്തമാക്കാൻ കഴിയാതെ പോയതിൽ വളരെയേറെ നിരാശയിൽ കഴിയുന്നുണ്ട്.

നമ്മുടെ നേട്ടത്തിനായി ക്ഷമയോടെ കാത്തിരിക്കേണ്ടി വന്നേക്കാം.

ഒരു ചെടി നട്ടാൽ അതിൽ നിന്നും ഫലങ്ങൾ ഉണ്ടാവാൻ അതിന്റെതായ സമയം ആവശ്യമായി വരുമല്ലോ.

എല്ലാവർക്കും അവരവരുടെ കഴിവിനനുസരിച്ചു നേട്ടങ്ങൾക്ക് വേണ്ടി അഹോരാത്രം പരിശ്രമിക്കാൻ സാധിക്കട്ടെ.