ഉൾകൊള്ളാൻ ഉൾകാഴ്ചകൾ:The Art of innerspring insight-265

 ഏതൊരു മനുഷ്യനും ഒരുപക്ഷെ ഏറ്റവും കൂടുതലായി ആഗ്രഹിക്കുക, തങ്ങളെ എല്ലാവരും ബഹുമാനിച്ചിരുന്നെങ്കിലെന്നാണ്.

ഓരോ വ്യക്തിയുടെയും സ്ഥാനവും, അധികാരവും, യോഗ്യതകളും, മറ്റുള്ളവരോടുള്ള പെരുമാറ്റവും, കഴിവും തുടങ്ങി പല കാര്യങ്ങളെയും ആശ്രയിച്ചായിരിക്കും ഒരുപക്ഷെ ആ വ്യക്തിയെ മറ്റുള്ളവർ ബഹുമാനിക്കുക.

 

മറ്റുള്ളവരിൽ നിന്നും ബഹുമാനം ഒരിക്കലും ചോദിച്ചു വാങ്ങിക്കേണ്ട ഒന്നല്ല.നമ്മുടെ ഭാഗത്തുനിന്നുള്ള നല്ല പെരുമാറ്റം വഴി മറ്റുള്ളവർക്ക് നമ്മളോട് ബഹുമാനം ഒരുപക്ഷെ തോന്നിയേക്കാം.ഒരു വ്യക്തി ചെയ്യുന്ന നല്ല പ്രവർത്തികളാണ് ആ വ്യക്തിയെ കൂടുതൽ ബഹുമാനത്തിന് അർഹത നേടികൊടുക്കുന്നത്.

മറ്റുള്ളവർ നമ്മളുടെ ആരുമായികൊള്ളട്ടെ, ആരുമല്ലാതായികൊള്ളട്ടെ എങ്കിൽ പോലും ബഹുമാനം നൽകേണ്ട സാഹചര്യത്തിൽ ബഹുമാനിക്കാൻ മറക്കാതിരിക്കുക.നമ്മൾ മറ്റുള്ളവരെ എങ്ങനെ ബഹുമാനിക്കുന്നു എന്നതനുസരിച്ചിരിക്കും വരും തലമുറകളും ഓരോരുത്തരെയും ബഹുമാനിക്കുന്ന കാര്യത്തിൽ ഒരുപക്ഷെ അനുകരിക്കുക.

അർഹമായ ബഹുമാനം ജീവിച്ചിരുന്നപ്പോൾ ലഭിക്കാതെപോയ ഒത്തിരിയേറെ മനുഷ്യർ നമ്മുടെയൊക്കെ ചുറ്റിലും ഒരുപക്ഷെ ഉണ്ടായേക്കാം.ഒരു മനുഷ്യൻ ജീവിച്ചിരിക്കുമ്പോൾ ആ വ്യക്തിയെ ബഹുമാനിക്കാൻ പഠിക്കുക.മരിച്ചതിനുശേഷം ലഭിക്കുന്ന ബഹുമാനം ഒരിക്കലും ജീവിച്ചിരിക്കുമ്പോൾ കിട്ടുന്നതിന് പകരമാകില്ലല്ലോ.

സമൂഹത്തിനുവേണ്ടി നല്ല കാര്യങ്ങൾ ചെയ്യുമ്പോൾ അംഗീകാരവും ബഹുമതികളും ലഭിക്കുന്നത് നല്ല കാര്യമാണ്, ഒരുപക്ഷെ മുന്നോട്ടു  നല്ല കാര്യങ്ങൾ ചെയ്യുവാൻ കൂടുതൽ പ്രചോദനം നൽകിയേക്കാം.

മറ്റുള്ളവരിൽ നിന്നും ബഹുമാനം ലഭിച്ചില്ല എന്നുകരുതി ഒരിക്കലും വിഷമിക്കാതിരിക്കുക.നമ്മൾക്ക് അർഹമായ ബഹുമാനം എന്നെങ്കിലും ഒരിക്കൽ നമ്മൾക്ക് ലഭിക്കുമെന്ന് പ്രതീക്ഷിക്കാം.

മറ്റുള്ളവരിൽ നിന്നും ബഹുമാനവും അംഗീകാരവും കിട്ടുമെന്ന് പ്രതീക്ഷിച്ചു മാത്രം ആവരുത് നമ്മുടെ ഓരോ പ്രവർത്തികളും.തന്നെക്കാൾ പ്രായത്തിൽ മുതിർന്നവരെ ബഹുമാനിക്കണം എന്നൊക്കെ പലരും നമ്മളോട് ഒരുപക്ഷെ ചെറുപ്പം മുതൽ പറയാറുണ്ടായിരിക്കും, മറ്റുള്ള വ്യക്തികളെ പ്രായം നോക്കാതെയും ബഹുമാനിക്കാൻ നമ്മൾക്ക് കഴിയട്ടെ.

ഈ ലോകത്തു ജീവിക്കുന്ന ഓരോ മനുഷ്യർക്കും അവരുടേതായ പ്രാധാന്യം ഉണ്ടെന്ന് മനസ്സിലാക്കി എല്ലാവരെയും നമ്മളെകൊണ്ട് ആകുന്നതുപോലെ ബഹുമാനിക്കാൻ നമ്മൾക്ക് കഴിയട്ടെ.മറ്റുള്ളവരെ ബഹുമാനിക്കാനുള്ള മനസ്സ് നമ്മൾ ഓരോരുത്തർക്കും നഷ്ടപ്പെടാതിരിക്കട്ടെ.