ഓരോ സമയവും നമ്മൾ ഓരോരുത്തർക്കും വളരെയധികം വിലപ്പെട്ടതാണ്.സമയത്തിന്റെ വില നമ്മളിൽ പലരും പലപ്പോഴും വിസ്മരിച്ചുപോകുന്നു. നഷ്ടങ്ങളിൽ നിന്നാണ് സമയത്തിന്റെ വില നമ്മളിൽ പലരും പലപ്പോഴും ശരിക്കും മനസ്സിലാക്കുക.
ഇന്നലെകളിലെ സമയം നമ്മളിൽ പലർക്കും വേണ്ടതുപോലെ പ്രയോജനപെടുത്താൻ ഒരുപക്ഷെ സാധിച്ചിട്ടുണ്ടാകില്ല, അതിന്റെ പേരിൽ ഒരുപക്ഷെ ഇന്ന് നമ്മളിൽ പലരും വളരെയധികം ദുഃഖം അനുഭവിക്കുന്നുണ്ടാകും.ദുഃഖം നമ്മളിൽ നിന്നും അകലണമെങ്കിൽ നിരാശ കൈവെടിഞ്ഞുകൊണ്ട് പരിശ്രമിക്കേണ്ടതായിട്ടുണ്ട്.
നമ്മൾക്ക് നഷ്ടപ്പെട്ട സമയം ഒരിക്കലും ഇനിയൊരിക്കലും നമ്മുടെയൊക്കെ ജീവിതത്തിലേക്ക് തിരിച്ചു കൊണ്ടുവരാൻ കഴിയില്ലല്ലോ. സമയം നമ്മൾക്ക് വേണ്ടി ഒരിക്കലും കാത്തിരിക്കില്ല.
ഇന്ന് ഈ നിമിഷം നമ്മൾക്ക് ലഭിച്ച സമയത്തെ വിലയുള്ളതായി കാണാൻ ശ്രമിക്കുക, പരമാവധി പ്രയോജനപെടുത്താൻ ശ്രമിക്കുക.
നമ്മളുടെ ജീവിതത്തിൽ പല തരത്തിലുള്ള ബുദ്ധിമുട്ടുകളിലൂടെ നമ്മൾ ഓരോരുത്തർക്കും കടന്നുപോകേണ്ടതായിട്ട് വന്നേക്കാം, ഈ നിമിഷവും കടന്നുപോകും അപ്പോഴെല്ലാം നല്ല നാളെകൾ നമ്മളെ തേടിയെത്തും എന്ന പ്രതീക്ഷയിൽ മുന്നോട്ടു സഞ്ചരിക്കുവാൻ കഴിയട്ടെ.
ഇന്നലെകളിലെ വേദനകളും നഷ്ടങ്ങളും മുന്നോട്ട് പരിശ്രമിക്കുന്നതിൽ നിന്നും തളർത്താൻ ഇടവരുത്താതിരിക്കട്ടെ.
നമ്മളുടെ മുന്നിൽ ധാരാളം നല്ല അവസരങ്ങളുണ്ട്, അതെല്ലാം കണ്ടെത്താൻ കഴിയണമെങ്കിൽ സമയം വേണ്ടതുപോലെ പ്രയോജനപ്പെടുത്താൻ സാധിക്കേണ്ടതുണ്ട്.
ഏതൊരു കാര്യത്തിലും പൂർണ്ണത കൈവരിക്കാൻ അതിന്റെതായ സമയം ആവശ്യമാണ്. പല കാര്യത്തിലും നേട്ടങ്ങൾ കൈവരിക്കാൻ ക്ഷമയോടെ കാത്തിരിക്കേണ്ടത് ആവശ്യമാണ്.
ഈ ഭൂമിയിൽ നാം ഓരോരുത്തരും ജനിച്ച നാൾ തൊട്ട് നമ്മളോടൊപ്പം സഞ്ചരിക്കുന്നത് സമയമാണ്.
നമ്മൾ ജനിച്ചതുമുതൽ മരണം വരെ ഈ ഭൂമിയിൽ നമ്മൾ ഓരോരുത്തർക്കും ചിലവഴിക്കാൻ സമയമുണ്ട്, അതുകഴിഞ്ഞാൽ നമ്മൾക്ക് ഇവിടെ എത്ര ആഗ്രഹിച്ചാൽ പോലും സമയം ലഭിക്കില്ലല്ലോ.നേരായ രീതിയിൽ സന്തോഷിക്കാൻ ലഭിക്കുന്ന അവസരങ്ങൾ നഷ്ടപ്പെടുത്താതിരിക്കുക.മുന്നോട്ടുള്ള നാളുകളിൽ നമ്മൾക്ക് വേണ്ടികൂടി സമയം കണ്ടെത്താൻ ശ്രമിക്കണം.ഇന്നലെകളിൽ നമ്മളോടൊപ്പം ഉണ്ടായിരുന്ന പലരും ഇന്നിപ്പോൾ ഇല്ല.ഓരോ മനുഷ്യരുടെയും സമയം പൂർത്തിയാകുമ്പോൾ ഈ ഭൂമിയിൽ മണ്ണോടു മണ്ണായി ഓരോ മനുഷ്യരും അലിഞ്ഞു ചേരും.ഇന്ന് നമ്മൾ മണ്ണിൽ ചവിട്ടി നിന്ന് എത്ര അഹങ്കരിച്ചാലും, നേട്ടങ്ങൾ നേടിയെടുത്താലും അതെല്ലാം ഒരിക്കൽ ഈ ഭൂമിയിൽ ഉപേക്ഷിച്ചുപോകേണ്ടവരാണ് നമ്മൾ എന്നത് മറക്കാതിരിക്കുക.
നമ്മൾ അനുഭവിക്കുന്ന വേദനകൾ, മറ്റാർക്കും തന്നെ ഏറ്റെടുക്കാൻ കഴിയണമെന്നില്ലല്ലോ.നമ്മുടെ വേദനകളെ ക്ഷമയോടെ സഹിക്കാൻ, ധിരതയോടെ ഏറ്റെടുത്തുകൊണ്ടു മുന്നേറാൻ നമ്മൾ ഓരോരുത്തരും കരുത്തരാകേണ്ടതുണ്ട്.
ജോലി തിരക്കുകൾ മൂലം പല കാര്യങ്ങൾക്കും വേണ്ടത്ര ശ്രദ്ധ കൊടുക്കാൻ നമ്മളിൽ പലർക്കും ഒരുപക്ഷെ കഴിഞ്ഞിട്ടുണ്ടാകില്ല.ജോലി തിരക്കുകൾക്കിടയിലും വേണ്ടത്ര കാര്യങ്ങളിൽ ശ്രദ്ധകൊടുക്കാൻ കഴിയേണ്ടതുണ്ട്.
എത്ര സമ്പത്തു നേടിയാലും സ്വന്തം ആരോഗ്യം ശ്രദ്ധിച്ചില്ലായെന്നുണ്ടെങ്കിൽ ആ സമ്പത്തുകൊണ്ട് ആ വ്യക്തിക്ക് എന്തെങ്കിലുംതരത്തിൽ പൂർണ്ണമായ പ്രയോജനം ലഭിക്കുമോ?.നമ്മൾ ചിലവഴിക്കുന്ന ഓരോ സമയവും ആരോഗ്യത്തിനുകൂടി മുൻഗണന കൊടുക്കാൻ ശ്രമിക്കുക.
എല്ലാവർക്കും എല്ലാ കാര്യവും നമ്മളോട് സമയം അനുസരിച്ചു പറഞ്ഞു തരാൻ കഴിഞ്ഞെന്ന് വരില്ല, നമ്മളുടെ ആരോഗ്യം നമ്മൾ തന്നെ ശ്രദ്ധിക്കുക, നമ്മുടെ ആരോഗ്യം മോശമായാൽ നമ്മൾ തന്നെയാണ് അതിന്റെതായ അത്യന്തികമായ ബുദ്ധിമുട്ട് അനുഭവിക്കേണ്ടി വരിക എന്നത് ഒരിക്കലും മറക്കാതിരിക്കുക.ആരോഗ്യം നശിപ്പിക്കുന്ന കാര്യങ്ങളിൽ നിന്നും വിട്ടുനിൽക്കുക.
നിമിഷസുഖത്തിനായി ആരോഗ്യത്തെ നശിപ്പിക്കുന്ന കാര്യം ചെയ്തുകഴിഞ്ഞാൽ നാളെകളിൽ ദുഃഖിക്കേണ്ടി വന്നേക്കാം.
നല്ല കാര്യങ്ങൾ പറഞ്ഞു തരാൻ നമ്മൾക്ക് ചുറ്റിലും ആളുകൾ എല്ലാ സമയവും ഉണ്ടാവണമെന്നില്ല.
നമ്മളുടെ ചുറ്റിലും നടക്കുന്ന തെറ്റുകളെയും ശരികളെയും തിരിച്ചറിയുക.തെറ്റുകളെ ജീവിതത്തിൽ നിന്നും നിരന്തരപരിശ്രമത്തിലൂടെ അകറ്റിനിർത്തുക.
ഇന്നിപ്പോൾ പലരും ഒറ്റപ്പെടലിന്റെ വേദന അനുഭവിക്കുന്നതിനു കാരണം തന്നെ അവരെ കേൾക്കാൻ, അവരോടൊത്തു സമയം ചിലവഴിക്കാൻ ചുറ്റിലും ആരുമില്ലായെന്ന തോന്നൽ വരുമ്പോഴാണ്.
മനുഷ്യർക്ക് തെറ്റുകൾ പറ്റാം ഒരു പക്ഷെ ആ നിമിഷം അവർ അനുഭവിക്കുന്ന ബുദ്ധിമുട്ടിന്റെ പ്രതിഫലനമാകാം തെറ്റുകൾ വരാനുള്ള കാരണം.
ഇന്നെലകളിലെ സന്തോഷങ്ങൾ നിറഞ്ഞ ഓരോ നിമിഷവും ദുഃഖങ്ങൾ സമ്മാനിച്ച ഓരോ നിമിഷവും ഇന്ന് ഒരുപക്ഷെ നമ്മളുടെ ഓർമ്മകളിലൂണ്ടാകും.വേദനിച്ച അനുഭവങ്ങളിൽ നിന്നും മുക്തരായിക്കൊണ്ട് ഇന്ന് ഈ നിമിഷം പ്രയോജനപ്പെടുത്താൻ ശ്രമിച്ചുകൊണ്ടിരിക്കുക.
നമ്മളെ വേദനിപ്പിച്ച കാര്യങ്ങൾ ഒരുപക്ഷെ നമ്മളിൽ പലരും കൂടെകൂടെ ഓർക്കും. വേദന ഉളവാക്കിയ അനുഭവങ്ങൾ എളുപ്പം മറക്കാൻ എല്ലാവർക്കും കഴിയണമെന്നില്ലല്ലോ. നമ്മൾക്ക് വേദനയുണ്ടാക്കിയത് ഒരുപക്ഷെ വ്യക്തികളാകാം,സാഹചര്യങ്ങളാകാം, നഷ്ടങ്ങളാകാം.
നമ്മൾക്ക് മുന്നോട്ടു വളർച്ച പ്രാപിക്കണമെങ്കിൽ ഇന്നലെകളിൽ നിന്നും നമ്മുടെ മനസ്സിലേക്ക് കടന്നു വന്ന നെഗറ്റീവ് ചിന്തകളെ, പോസിറ്റീവ് ചിന്തകൾക്കൊണ്ട് മറികടക്കേണ്ടതായിട്ടുണ്ട്.
എത്ര സൗന്ദര്യം നിറഞ്ഞ, സുഗന്ധം പരത്തുന്ന പൂവ് ആണെങ്കിലും ആ ഒരു പൂവിനു അധികനാൾ അതിന്റെ ചെടിതണ്ടിൽ നിലനിൽക്കാൻ കഴിയില്ലല്ലോ, ആ പൂവ് അതിന്റെ സമയം പൂർത്തിയാക്കുമ്പോൾ കൊഴിയും മണ്ണിൽ അലിഞ്ഞു ഇല്ലാതെയാകും.ഈ സമയവും കടന്നുപോകും എന്നത് പ്രകൃതി നിയമമാണ്.
കാലത്തിനു അനുസരിച്ചു നമ്മുടെ ചുറ്റിലും മാറ്റങ്ങൾ ഉണ്ടായികൊണ്ടിരിക്കും, മാറ്റങ്ങളെ ശരിയായ വിധത്തിൽ ഉൾകൊള്ളാൻ നമ്മൾ ഓരോരുത്തർക്കും കഴിയേണ്ടതുണ്ട്.
നമ്മൾക്ക് മുന്നേ ഈ ഭൂമിയിൽ ജീവിച്ച എത്രയോ കോടാനുകോടി ജനങ്ങളാണ് അവരുടെ ആയുസ്സിന്റെ നല്ലൊരു ഭാഗവും അധ്വാനിച്ചത്, അവരുടെ അധ്വാനത്തിന്റെ ഫലമാണ് നമ്മൾ ഇന്ന് അനുഭവിക്കുന്നത്, അവരുടെ ബുദ്ധിമുട്ടുകളിൽ നിരാശയോടെ അവർ ഒന്നും ചെയ്യാതെ കഴിഞ്ഞെങ്കിൽ ഇന്നിപ്പോൾ നമ്മൾക്ക് കിട്ടിക്കൊണ്ടിരിക്കുന്ന സുഖസൗകര്യം ഒന്നും തന്നെ ഒരുപക്ഷെ ലഭിക്കണം എന്നില്ലല്ലോ.
ഈ ഭൂമിയിൽ ഇനിയുള്ള കാലം ജീവിക്കാനുള്ള വരും തലമുറക്കായി നമ്മൾ ഓരോരുത്തർക്കും നല്ല കാര്യങ്ങൾ ചെയ്യാൻ കഴിയട്ടെ.
ഇന്നലെകളിൽ നമ്മുടെയൊക്കെ ജീവിതത്തിൽ വേദന ഉളവാക്കിയ സാഹചര്യം എന്തുമായിക്കൊള്ളട്ടെ അതിൽ നിന്നെല്ലാം നമ്മുടെ മനസ്സിനെ സന്തോഷം ഉളവാക്കുന്ന സാഹചര്യത്തിലേക്ക് മാറ്റിയെടുക്കേണ്ടതായിട്ടുണ്ട്, അതിനായി നല്ല ചിന്തകളെ മനസ്സിലേക്ക് കൊണ്ടുവരിക, നമ്മളിലേക്ക് കടന്നുവന്നിട്ടുള്ള നെഗറ്റീവ് ചിന്തകളെ നിരന്തരപരിശ്രമത്തിലൂടെ ഒഴിവാക്കുക.
ഓരോ സമയവും നമ്മളെ ഒത്തിരി കാര്യങ്ങൾ പഠിപ്പിച്ചുകൊണ്ടാണ് കടന്നുപോകുന്നത്. നഷ്ടവും ലാഭവും ജീവിതത്തിൽ ഏവർക്കും ഉണ്ടാകും എന്ന് ഈ പ്രകൃതി നമ്മളെ പഠിപ്പിക്കുന്നുണ്ട്. രാത്രിയും പകലും മാറിമാറി വരുന്നതുപോലെ നമ്മുടെയൊക്കെ ദുഃഖങ്ങൾ കാലത്തിന്റെ മാറ്റങ്ങൾക്ക് അനുസരിച്ചു മാറിക്കൊണ്ട് സന്തോഷം നൽകട്ടെ. ഒന്ന് നഷ്ടപ്പെട്ടാലാണ്, നഷ്ടപ്പെടുത്തിയാലാണ് മറ്റൊന്ന് നേടാൻ ഒരുപക്ഷെ സാധിക്കുകയുള്ളു.
മറക്കാനാവാത്ത വേദനകൾ, മറക്കാനാവാത്ത സാഹചര്യങ്ങൾ, മറക്കാനാവാത്ത നഷ്ടങ്ങൾ ഇതെല്ലാം നമ്മുടെയൊക്കെ ജീവിതത്തിൽ പല സാഹചര്യത്തിലും കടന്നുവന്നേക്കാം.ആ സാഹചര്യങ്ങളെ ശരിയായ വിധത്തിൽ കൈകാര്യം ചെയ്യാൻ കഴിയട്ടെ.
ഇന്ന് ഈ നിമിഷം എങ്ങനെ ചിലവഴിക്കണമെന്നത് നമ്മുടെ ഓരോരുത്തരുടെയും തീരുമാനമാണ്. ഇന്നലെകളെയോർത്തു നിരാശപ്പെട്ടിരിക്കണോ അതോ നാളെകളിൽ നേട്ടങ്ങൾ സ്വന്തമാക്കാൻ പ്രതീക്ഷകളോടെ മുന്നോട്ടു പരിശ്രമിക്കണോ എന്നത് നമ്മുടെ ഓരോരുത്തരുടെയും തീരുമാനമാണ്.
നാളെകളിൽ നേട്ടങ്ങൾ കൈവരിക്കാൻ ഇന്നിന്റെ ബുദ്ധിമുട്ടുകളെ ശരിയായ വിധത്തിൽ നേരിടേണ്ടതായിട്ട് വരും, നമ്മൾ നേരിടുന്ന സാഹചര്യത്തെയും,നമ്മളുടെ ചുറ്റിലുമുള്ള ആരെയും കുറ്റപ്പെടുത്താതെ ബുദ്ധിമുട്ടുകളെ ശരിയായ വിധത്തിൽ കൈകാര്യം ചെയ്യാൻ നമ്മൾ ഓരോരുത്തർക്കും കഴിയട്ടെ.
ആരെയും ബുദ്ധിമുട്ടിക്കാതെ, വേദനിപ്പിക്കാതെ മറ്റുള്ളവർക്ക് ആവശ്യമായ സാഹചര്യത്തിൽ വേണ്ട സഹായം നൽകികൊണ്ട്, നമ്മുടെ ചുറ്റിലും സന്തോഷവും സമാധാനവും നിറഞ്ഞ അന്തരിക്ഷം സൃഷ്ടിക്കാൻ നമ്മൾ എല്ലാവർക്കും നമ്മൾക്ക് ലഭിച്ച സമയത്തെ വേണ്ടതുപോലെ പ്രയോജനപ്പെടുത്താൻ ഇനിയുള്ള കാലം സാധിക്കട്ടെ.